Footer

Sekretario Jesse Robredo: “Pagsarmingan iti Napudno a Gobierno”

By: Luz Astom and Perlita Fontejon, August 30, 2012

 

Dagiti napipintas a nagappuanan ti maysa a mangidaulo ket maipagpannakkel iti sadinoman a disso…

Kadagitoy napalabas nga aldaw, agsinnumbangir iti radio, telebision, diario ken dadduma pay ti panangipadamag iti pannakatay ni Sekretario ti DILG Jesse Robredo. Iti saan a napakpakadaan nga ipapatay a nangkeltay ken naggibusan ti biag ni Sekretario Robredo, ti napudno a panagserbi ken nadalus a panangidaulo ket agtalinaedto a kankanayon kadagiti puspuso ken panunot dagiti Pilipino a nagserbianna a sipupudno.

Maipagpannakkel ti adu a Pilipino ni Sekretario Robredo a kas responsable nga ama, managayat nga asawa, napudno a gayyem ken mapagtalkan nga agserbi kadagiti tattao.

Adu ti nagladingit iti ipupusay ni Sekretario Robredo. Ibagbaga dagiti dadduma a ti biag ken aramidna a kas maysa a lider ket agbalin koma a pagtuladan wenno modelo, saan laeng dagiti opisiales ti gobierno wenno dagiti addaan iti puesto no di dagiti amin a Pilipino.  Usarenda koma nga inspirasion nga agbalin a napasnek a mangipatungpal kadagiti akemda a mangipakita iti pudpudno a kaipapanan ti panagayat iti Dios, panagayat iti pagilian ken panagayat kadagiti serserbianda a tattao. Sapay koma ta iti ipupusayna ket mangibati iti naisangsangayan nga adal kadatayo amin a pinanawanna. Ket tuladentayo daytoy napateg nga impatawidna tapno mapapintas ken maparang-aytayo ti pagiliantayo.

Adu ti imbati kadatayo ni Sekretario Robredo a mabalin a pagsarmingan ken masapul nga itultuloytayo dagitoy napintas a galad ti panangidaulona.  Kas kadagitoy sumaganad: warning LGUs vs enacting anti-contraceptive rules, anti-epal memo, promotion of catchbasin ken dadduma pay.

Idi Hunio iti daytoy a tawen, impablaak ti DILG nga addan sangaribu, innem a gasut ken nubenta y siete wenno 99 a porsiento iti lokal a gobierno ti nagtungpal kadagiti paglintegan nga inyussuat ni Sekretario Robredo. Iti isu met laeng a bulan, adda met walo gasut limapulo ket innem a lokal a gobierno ti napagasatan a makagun-od iti nasurok maysa a bilion pesos a suportaran ti programana (Performance Challenge Fund).  Daytoy a kuarta ket pondo a nakasagana a maited para kadagiti kapapanglawan manipud kadagiti napanglaw a pamilia.

Ti DILG ket nakikinnammayet kadagiti barangay ken simbaan (Ugnayan ng mga Barangay at Simbahan wenno U.B.A.S) ken kasta met kadagiti organisasion ti eskuela (kas iti Ateneo School of Government ken De La Salle University) tapno mabantayan dagiti pondo ti lokal a gobierno ken masubaybayan no kasano ti pananggasto ken panangiserbida iti pondo para iti bukodda a lugar.

Maysa pay a programa a naimplementar ti makunkuna a “Seal of Disaster Preparedness.” Inyussuat ni Sekretario Robredo daytoy a programa a maysa kadagiti makatulong a mekanismo tapno matulongan ti lokal a gobierno a makitimpuyog kadagiti tattao iti tiempo ti rigat ken kalamidad. Saan laeng nga iti benneg ti lokal a gobierno ti ikkanna iti importansia, ngem inramanna pay a patibkeren ti ekonomia ti lokal a gobierno.

Sumamagmamano laeng dagitoy a programana a kas nakatugaw a sekretario iti DILG. Adu pay ti programa ni Sekretario Robredo maipanggep iti pannakapasayaat ti sistema ti lokal a gobierno.

Ni Sekretario Robredo ti maysa kadagiti maidumduma nga inspirasion wenno pagwadan ti amin a Pilipino gapu ta karkarna ti tao nga addaan iti nangato a saad iti gobierno a kas kenkuana.

Napalalo ti panangidaydayaw dagiti tattao kenkuana ta ti gapuna saan a napangas nga opisial, sinsero nga agserbi ken simple ti panagbiagna. Makitam laengen ti panagbadbadona, no mabalin saanna kano pay a kayat nga usaren dagiti agkakangina a badbado nga adda naganna ta ngamin mabain. Isu a no adda sadiay ilina a Naga, nakatsinelas laeng ken nakaaruat iti simple. Daytoy laengen ti pangiyarigan no kasano ti kinapakumbabana nga agserbi iti pagilianna. Sapay koma ta amin dagitoy nga inar-aramid ken impakpakitana, masursuro koma amin dagiti adda akemna iti gobierno.

Agkaykaysatayo a mangitandudo iti napintas a panangituray manipud kadagiti lokal a gobierno. Maysa daytoy a panangipakitatayo iti panangrespetotayo iti biag ni Sekretario Robredo ken agtalinaed latta a kankanayon iti puspusotayo ken tapno kankanayontayo a silalagip iti kinaimbagna.#