Footer

Agtuturay, empleado ti Vigan City, pinabaroda commitment iti siudad

VIGAN CITY – Pinatalgedan dagiti agtuturay ken empleado ditoy iti panangidaulo ni Mayor Eva Marie S. Medina ti commitmentda ken panangsaluad ken panangsalaknibda daytoy a siudad kas tawid ti sangalubongan itay Septiembre 8, aldaw a pannakaselebrar ti Heritage Cities Solidarity Day.

Kadua ni Mayor Medina dagiti hues ken sangaili a nagbuya iti Repazzo de Vigan a nakaiparangan dagiti nadumaduma a paset ti historia ti siudad a nagkakammayetan nga imparang dagiti amin a barangay manipud idi tiempo dagiti Kastila, agingga iti panagbalinna a siudad ken maysa kadagiti naipangruna a destinasion dagiti turista iti Amianan a Luzon.

Kas paset ti selebrasion, naitampok dagiti nadumaduma nga aktibidad a pakairamanan ti  Food and Trade Fair a nakipartisiparan ti aganay 110 a negosiante manipud kadagiti nadumaduma a probinsia iti Amianan a Luzon,   Fotografias y Recuerdos ken Historia Oral, Sabayang Pagbigkas (speech chorus), zarzuela Ilocana, daniw, dallot, Kinnantaan, Folkdance competition, Dance Sports ken dadduma pay nga aktibidad a nangitampok iti kultura ni Ilokano.

Iti umuna a gundaway, nakipartisipar iti parada idi Septiembre 8 ti GMA Kapuso.#

Comments are closed.