Footer

BANNER NEWS: 5 police officers napadayawan kas Model PNP Families

CAMP BGEN OSCAR M FLORENDO, SAN FERNANDO CITY, La Union – Lima a polis officers ti binigbig ti Police Regional Office 1 (PRO1) a modelo a pamilia ti PNP bayat ti culmination program kas panangselebrar iti National Crime Prevention Week a naangay iti Concord Building ditoy idi Setiembre 7.

Indauluan ni Senior Police Officer 4 (SPO4) Igmedio L. Dugeña  ken ti pamiliana dagiti uppat a sabali pay a regional awardees nga immawat iti plake ti pammigbig. Ni Dugeña ken ti pamiliana ti 1st runner-up Model PNP Family iti national category.  Agdama a naka-assigned ni Dugeña iti San Fernando Police Station ditoy siudad.

Karaman kadagiti immawat iti pammadayaw ti pamilia da SPO4 Elmer G. Jaramel manipud iti Sta. Cruz Police Station iti Ilocos Sur; SPO3 Arcellie O. Pang-ag iti Burgos Police Station; Police Senior Inspector Judy B. Calica iti Bauang Police Station ken SPO4 Rodrigo N. Noe iti Aringay Police Station, agpapada nga iti La Union amin.

Immawat met ni Police Officer 2 Dario G. Paragas ti Pangasinan Police Provincial Office iti sertipiko ti komendasion gapu iti impakitana a kinatured iti panangipatungpalna iti pagrebbenganna.

Iti panagbitlana, dinayaw ni Police Chief Superintendent Franklin Jesus B. Bucayu, Region 1 police director, ti pannakitinnulong dagiti amin nga stakeholders iti komunidad idinto nga innayonna a saan laeng a responsibilidad dagiti polis ti pannakalapped ti krimen no di napateg pay ti tulong manipud iti komunidad.

Dinayaw met ni National Police Commission (NAPOLCOM) Director Angelita B. Concepcion dagiti nakipartisipar nga ahensia gapu iti panagballigi ti makalawas nga aktibidad.

Inyunay-unay met ni La Union Provincial Board Member Joaquin O. Ostrea, naisangayan a sangaili, ti annongen ti gobierno iti pannakalapped iti krimen kas iti pannakaipaay dagiti panggedan idinto nga indagadagna kadagiti empleado ti gobierno ti saanda a panagkunniber ken panangidaulo ti bukodda a pamilia babaen ti aramid, ken panangakayda kadagiti annakda iti nalinteg a dalan.

Addan iti maika-18 a tawenna, maang-angay ti National Crime Prevention Week iti tunggal umuna a lawas ti Septiembre iti sidong ti NAPOLCOM babaen ti Proclamatioin No. 461, series of 1994.

Ti tema ita a tawen: “Sa Crime Prevention, May Magagawa Ako”.#

Comments are closed.