Footer

Eroplano naikras iti bantay

CERVANTES, Ilocos Sur – Nasuerte  daytoy piloto nga Indonesian National ta naliklikanna ti kumpay ni Patay kalpasan a naikras ti linugananna nga eroplano iti  kabanbantayan a sakup ti Sitio Maslo, Brgy. Dinwede West, ditoy nga ili idi malem ti Setiembre 3, 2012.

Nainaganan ti piloto a ni Michael Djaja, 19, baro, estudiante iti Leading Edge International Aviation Academy, Puro Point, San Fernando City, La Union.

Iti report manipud iti police station ditoy, pinatayab ni Djaja ti single engine Cessna 152 Plane RPC 6971 idi agarup alas onse ti bigat ti Septiembre 3 ket agam-ampayag iti 3,000 feet above sea level iti panagsublina iti pagadalan idi nadlawanna nga adda ubo ti makina daytoy sa kellaat a nagsardeng a nakaigapu iti emerhensia nga isasangladna iti nasao a lugar.

Naimatangan ni Eric Silano y Owayet ti panagsuek ti eroplano ket inreportna daytoy kadagiti kalugaranna sada nagturong iti nakatinnagan ti lugan tapno tulonganda ti piloto.

Nasarakanda ni Djaja a naipit ket inakkalda sada impan iti Sitio Batawang, nangruna iti pagtaengan ni Barangay Kagawad Rolando Adiwang.

Nabtak ti bibig ni Djaja ken nadundunor ti nadumaduma a paset ti bagina. Nupay kasta, awan ti grabe unay a sugatna.

Immarayat met dagiti polis nga indauluan ni Police Senior Inspector Joel Lagto, OIC, ken maysa a bunggoy ti Philippine Army nga indauluan ni Second Lt. Alvin dela Cruz ket iti inwayatda nga inbestigasion, nakumpirmada a maymaysa ni Djaja a nakalugan iti eroplano.

Dimteng met ti Philippine Air Force, Department of Transportation and Communication, ken ti LEIA ket intarayda ti piloto iti Lorma Medical Center iti San Fernando City tapno mataming dagiti sugatna.

Agtultuloy ti panagimbestiga ti Civil Aviation Authority of the Philippines mainaig iti insidente.

Pinatayab ti Indonesian national ti eroplano tapno makumpleto ti orasna a nagsanay.

Iti pannakaisurat daytoy, saan pay a naibaba ti eroplano iti nakaisalatanna.#

Comments are closed.