Footer

Iti iruruar ni GMA iti ospital, naiserbin ti hustisia?

Ni  Danny B. Antalan

(Maudi iti dua a paset)

 

Tatta a nakaruar manen, mapalubosan ngatan nga agballasiw-taaw?

Ngem makaruar ngata ditoy pagilian ni GMA no kasapulan met a mangala iti pammalubos iti tallo a korte gapu kadagiti kaso a sangsanguenna.

Ken narigat a makaruar ngata, ta adu unay ti masapul a sungbatanna, pakairamanan ditan ti kontrobersial a “Hello Garci”, ti mapapati a wiretapped conversationda iti maysa a nangato nga opisial ti Comelec   mainaig iti panagkusit idi 2004 presidential election a nakaigapu iti panagprotesta dagiti tattao iti kalsada tapno pilitenda nga aglusulos iti takemna.  Isuna laeng ta awan nagmamaayanna.

Adda pay ti $329.5 milion nga NBN-ZTE deal;  ti Jocjoc Bolante Fertilizer Scam;  PNR Railway Deal scam; Russia Euro General airport scandal; P105 milion PNP helicopter deal, ken dadduma pay.

Iti biang ti Malacanang, dida metten nakiriri iti desision ti korte nupay napasamak ti panakawayawaya ken ni GMA  dua nga aldaw kalpasan ti State of the Nation Addres ni Presidente Aquino.  Iti dayta a SONA, kinuna  pay met ni PNoy nga itultuloyda ti panangbirok iti hustisia kadagiti inar-aramid ti sigud a presidente bayat ti panagtakemna.

Kinuna ketdi ti Malakaniang a daytoy ti mangipaneknek nga adda bangen ti akem iti nagbabaetan iti ehekutibo ken hudikatura.  Saan a kas kunkunada a kontrol ni PNoy ti tallo nga adigi ti gobierno.

Naipaimadan iti Commission on Elections dagiti addangda iti panagprogreso ti nasao a kaso.  Uray ket COMELEC met ti nangipila iti kaso.

Ngem ketdi, nakasaganan ti nadagdagsen a kaso a plunder maikontra ken ni GMA.  Non-bailable, kayatna sawen, di mabalin nga agpiansa.  Kayatna a sawen, iti oras a maaresto manen ni GMA, awanton ti gawayna a makaruar agingga a malpas ti kaso… no mapaneknekan nga awan pakainaiganna.  Ngem no adda, inkapilitan nga aggian iti pagbaludan.  A kas iti panaggian iti pagbaludan ni sigud a presidente Joseph Estrada, nga inagawanna ti takem idi 2001.

Ti di mapiansaan a kaso ti panagkusit ket nagramut manipud di napintas a panakabusbos iti pondo ti Philippine Charity Sweeptakes Office.

Ngem kitaentayo met ti siglaten ti Malakaniang.  No agturogturogda, mariinganda laengen nga adda gayamen ni GMA iti ruar ti Filipinas.  Adu met ti pakulo no kua ni GMA, kas koma iti isasarangna iti publiko a naka-wheelchair, a natulad payen ti dinutokanna a Chief Justice Renato Corona… a na-impeach met laeng.

Adda pay laeng ti brace ti tengngedna, kunadan sa.

Iti biang met ni sigud a presidente Arroyo, bayat nga adda temporario a waya-wayana, ganasenna pay laeng ti kaaddana iti sidong ti appo, anak, kapamilia ken kakabagianna, agraman dagiti kakailianna iti maikadua a distrito ti Pampanga nga iserserbianna.

Alas 930 ti bigat idi naammuanda a mabalinen nga agiposte ti piansa, insigida a naisagana ti P1 a milion.  Alas dos y media iti malem, babaen ti coaster a puraw a naglugananna, nagsuot met laeng iti white suit, rimmuaren iti VMMC.  Adu ti nangpadas a nanglapped iti luganna, nangruna dagiti nadalananna iti panagtakemna, ngem awanen ti naaramidanda iti panagarangkada ti luganna.  Awan sawirnan iti dalan  agingga a nakadanon iti La Vista Village, Quezon City.  Ditana laeng a linuktan ti tawa ti lugan, impettakna ti isemna agraman ti panangiwagaywayna ti imana kadagiti die-hard a supportersna.#

 

Comments are closed.