Footer

Sept. 8: Feast of the Nativity of Blessed Virgin Mary

Ni Maria Theresa B. Santos

 

 

Tunggal Setiembre 8 a selebraran ti Feast of the Nativity of Blessed Virgin Mary. Wenno selebrasion iti aldaw ti pannakaipasngay ni Birhen Maria.  Iti daytoy a selebrasion,  sangsangkamaysa dagiti Kristiano a kumablaaw iti naragsak a panagkasangay ti Nainlangitan nga Ina. Di mabubos ti panagyaman ni Kristiano ta dimteng manen daytoy nga aldaw a panangselebrar iti kasangay ti Nainlangitan nga Ina ket iyebkasna ti panagyamanna iti di mamingga a panangibabaet  ti Ina kadagiti annakna iti Namarsua.

Naisangsangayan nga aldaw ken maysa a liturhikal a selebrasion (ti simbaan), saan laeng a dagiti Romano Katoliko no di pay dagiti Anglicans ken kasta metten dagiti kapadana, ti Eastern Orthodox a kagiddan met ti panangselebrarda iti Nativity of Theotokos a mangidetalye iti panagkasangay ti Nainlangitan nga Ina.

No selebraran ti tao ti aldaw ti panagkasangayna, lalo pay koma a tagipatgen ken selebraran daytoy nga aldaw.

Adda dagiti sumagmamano a pakasaritaan a nakailanadan ti petsa 8 iti Setiembre a pannakaipasngay ni Birhen Maria.

Kas iti maysa a pakasaritaan idi maika-5 a milenio a nalatak la unay ken naimula iti muging ken puso dagiti managayat.

Napasamak daytoy iti maysa a mannalon sadiay France. Nakita ni mannalon babaen ti bision a siraragsak nga agkankanta dagiti anghel sadi Langit. Naayatan ti mannalon iti naimatanganna ken nangngegna a kankanta dagiti anghel. Saan a nagawidan ni mannalon ti nagsaludsod. Kinuna dagiti anghel a selselebraranda ti kasangay ni Ina Maria isu a siraragsakda nga agdaydayaw.

Sinarak ni mannalon ni Obispo Maurilius a nangibagaanna iti naipaltiing kenkuana. Napaliiw met ti Obispo ti kinasinsero ti mannalon. Naadal a nalaing ken napaliiw ti naisangsangayan a naipaltiing. Ditan a namunganayan ti selebrasion ti panagkasangay ni Santa Maria iti Setiembre 8.

Ti maysa pay a tuodan ti selebrasion ti pannakaiyanak ni Birhen Maria kas nailanad iti Protoevagelium of James a maitudo a nasurat idi 150 A.D.  Nailanad itoy a sinurat a dagiti nagannak ni Birhen Maria ket da Anne ken Joachim. Saan a naaddaan iti anak dagiti agassawa agingga idi nagparang ti maysa nga anghel ken ni Anne a nangibagaanna  a babaen ti bileg ti Espiritu Santo maaddaanto iti anak a babai.

Ti maysa pay a historical account ket maitudo a nangrugi ti selebrasion ti pannakaipasngay ni Birhen Maria idi maika-6 a millenio sadiay Syria ken Palestina. Ni Romanus, nga idi agangay ket nagbalin a deakono ti simbaan ti Constantinople ket nagsursurat iti adu a himno maipapan iti Birhen agraman ti pannakaipasngayna. Nagkayamkam ket limmawa ti masakupan dagiti agrukbab agingga iti makindaya a paset ti Roma. Inadaptar ti simbaan Romano Katoliko ti panagrukbab.

Nagduduma man a bersion ti tuodan ti amin a pakasaritaan, sangsangkamaysada met a nangidetalye a naipasngay ti Birhen Maria iti petsa 8 ti Setiembre.

Saan a napateg ti petsa kadagiti amin nga agrukbab ta naisurat a mismo iti puso ken panunotda a naiyanak ni Birhen Maria nga isunto ti agbalin nga Ina ti Mannubbot; nga ininawna ti Anak ti Dios babaen ti bileg ti Espiritu Santo.

Mailadawan ti pannakaipasngay ti kabarbaro a namnama. No adda  namnama, adda saan a mailadawan a kinaragsak a marikna ti sangkataw-an. Kinaragsak a kas iti marikna itoy a kasangay ti Nainlangitan nga Ina.#

Comments are closed.