Footer

7 a naipuslit nga oversized a baboy, nasalamaan dagiti polis

BANTAY, Ilocos Sur – Nanabtuog iti ima dagiti nagtitipon nga elemento dagiti polis ti maysa a lalaki kalpasan a nasalamaanda ti minanehona a lugan a nagkarga iti pito nga oversized a baboy a mapapati a maibiahe iti San Vicente sada maiserrek a maparti iti slaughterhouse ti siudad ti Vigan.

Segun iti report manipud iti provincial police office ditoy, pinasardeng dagiti polis ti truck idi agarup alas dies ti rabii ti Septiembre 10 iti checkpoint nga impasdekda iti Barangay Banaoang, ditoy nga ili  ket saanda a pinagtuloy nga agbiahe ti lugan kalpasan nga awan ti maipakita ni Joey Daplian y Wadawad, residente iti Man-atong, Suyo, Ilocos Sur a dokumento para iti pannakaibiahe dagiti baboy.

Kinuna ni Provincial Veterinarian Dr. Joey Warren Bragado nga imbilin ni Gov. Luis “Chavit” Singson ti pannakikammayyetna ken ni Provincial Director Police Senior Supt. Noel B. Amoyen para iti pannakaiwayat dagiti spot inspection/checkpoint para iti pannakatiliw dagiti agipuspuslit iti baboy ditoy probinsia.

Kinuna ni Bragado nga in-inut dagiti baboy a naiserrek iti probinsia sada napagtitipon a naibiahe a maidissaag iti kaparanget nga ili ti Vigan City.

Kinuna ti provincial veterinarian nga awan a pulos ti dokumento a naipakita dagiti nagibiahe kadagiti oversized a baboy isu a kinumpiska dagitoy.

Kanaig daytoy, imbilin ni Gov. Luis “Chavit” Singson ti pannakaparti dagiti nakumpiska a baboy sada maiwaras iti sumagmamano a pasdek ti kaasi a pakairamanan ti  Balay Taripato iti Magsingal, provincial jail, Vigan City Jail, ken ti Gabriela Silang General Hospital.

Daytoy ti maikadua a gundaway a nasalamaan dagiti polis ni Daplian a naggandat a mangipuslit kadagiti oversized a baboy iti probinsia.

Idi parbangon ti Agosto 17, nasalamaan dagiti polis-San Esteban ti grupo dagiti lallaki nga agiyal-alis kadagiti sangapulo ket maysa a baboy manipud iti Isuzu Elf a minaneho ni Daplian.

Natiliw ni Daplian sumagmamano nga aldaw kalpasan ti interbio ti DWRS Barangay Commando Brigada  a programa ni Anchorman Romeo “Jun” Ramos ken ni Vigan City Slaughterhouse Master Arnulfo Quitoriano a nangipalgakan ti naud-udi nga adu dagiti takong a maparparti iti slaughterhouse ti Vigan nga awan ti papelesda a suspetsana a naipuslit manipud sabsabali a probinsia.

Impudno ti pahinante ti nasao a lugan a nagdaliasatda manipud iti Mankayan, Benguet a napan iti Cervantes sada simmalog iti Suyo ken limsot iti Tagudin a nagurayan ti sabali a lugan a nangikargaanda kadagiti oversized a baboy.

Mapapati a maidissaag dagiti baboy iti San Vicente. Nupay kasta, saan nga innaganan ni Bragado ti nasao a negosiante ti baboy iti San Vicente.

Kasta met a saan nga impalgak ni Bragado no asino dagiti agparparti iti baboy ti nagiserserrek kadagiti takong a maparti iti slaughterhouse iti Vigan City.

Iti maysa nga interbio ken ni Quitoriano, nadakamatna nga adda dagiti maiserserrek a takong a maparti iti slaughterhouse iti siudad a suspetsa a naipuslit manipud iti sabsabali a probinsia.

Iti dayta nga interbio, kinuna pay ni Quitoriano a nupay awan ti papeles dagitoy a takong, clean and in good health dagitoy agsipud ta nakalusotda iti quarantine checkpoint iti Barangay Bio, Tagudin.#