Footer

Bangko natakawan

STA. CRUZ, Ilocos Sur – Malas dagitoy a mannanakaw ta nupay nagballigida a nangserrek iti maysa a bangko ditoy nga ili, biddut ti inyunada a linuktan a vault ta daydiay awan ti naggianna a kuarta.

Kas konsuelo de bobo, nakurang a dies mil, malaksid ti 1280 model a selpon ken dua a 12-gauge ammunition para iti shotgun ti nagbalin laeng a sukat ti bannog, puyat ken panangipustada iti karadkad ken biagda bayat ti panangisayangkatda iti panagtakaw iti nasao a bangko.

Ti pay makadakes, babaen ti ladawan a nai-save iti selpon ni COP ti Sta. Cruz, Police Chief Inspector Faustino C. Bandao, nabigbig  dagiti empleado ti JJ Rome Travellers Inn ti maysa kadagiti suspek a nagtsek-in iti nasao a pagdagusan idi Septiembre 8, mapapati a pannakaisayangkat iti panagtakaw iti Rang-ay Bank.

Kasta met a binigbig ti waitress ti Lutong Bahay Restaurant ti nasao met laeng a suspek a maysa kadagiti naggiinom iti nasao a restaurant.

Maisagsaganan ti kaso a robbery maikontra ken ni Benjie Bandao Pagad-o, mangar-aramat  iti nadumaduma nga adres a kas iti Pico, La Trinidad, Benguet, ken Belance, Nueva Ecija, ken dagiti tallo a kakaduana a nainaganan amin iti John Does.

Sinaklangan ti Binalonan Police Station ni Pagad-o iti attempted robbery idi 2011 ngem dinismis ti prosecutor.

Sa laeng naduktalan ti panagtakaw iti Rang-ay Bank a masarakan iti asideg ti national highway a sakup ti Poblacion Este ditoy nga ili idi agarup alas 4:10 ti malem ti Septiembre 9 kalpasan a nagpulong  ni Joyce Carrido Y Velasco iti polis a naserrek ti Avon Botique nga imatonanna.

Iti panagimbestiga dagiti polis, naduktalan a nakastrek dagiti mannanakaw iti Rang-ay Bank babaen ti Avon Botique.

Pinadas dagiti mannanakaw a luktan babaen ti acetylene ti sabali a vault a mapapati a naglaon kadagiti napapateg a dokumento ken kuarta ngem napaayda.

Narekobre dagiti inbestigador dagiti sumaganad  nga instrumento iti uneg ti bangko: bassit nga LPG tank, acetylene, kitchen knife, medical oxygen tank, 2 screwdrivers, electric drill, mechanical hand drill, 3 pinch bar ken maysa a cutter.

Awan ti naireport a natakaw iti Avon Botique.#