Footer

Barangay tanod ginudas masuspetsa a kameng ti NPA

SALCEDO, Ilocos Sur – Dua a nagsina nga insidente ti pammaltog a puon ti nakatayan ti maysa a barangay tanod ken ti pannakaiyospital ti maysa a baro ti napasamak ditoy nga ili ken iti Sinait idi Septiembre 12.

Nagreport ni dati a Barangay Kagawad Ernesto Wagayen iti polis nga idi agsapa ti Septiembre 13, nasukalan a natayen iti uneg ti balayna ni Antonio Constantino y Ramos, 48, balo, barangay tanod ken residente iti Barangay San Tiburcio ditoy nga ili.

Iti panagimbestiga dagiti nagresponde a polis, naammuan nga idi agarup alas 9:00 ti rabii ti Septiembre 12, bayat ti panaggiinom da Efren Erese, Romeo Gutiba, Bonie Gutiba, Alex Santa Brigada ken ni Constantino iti balay ni Erese, maysa a motorsiklo ti nagsardeng iti abagatanen a paset ti balay ket maysa kadagiti tallo a naglugan ti nangayab iti biktima.

Rimmuar ni Constantino ket kalpasan ti sumagmamano a minutos, nagsubli sa nagpakada nga aggawid ta mapanna ilutuan dagiti sangailina.

Imbaga pay ti biktima a “dagidiay kakadua” dagiti sangailina.

Iti agarup alas 11:00 ti rabii, nakangeg ti grupo iti sumagmamano a kanalbuong ti paltog.

Kabigatanna, iti agarup alas 6:00 ti agsapa, napan ni Romeo Nartea, kapidua ni Constantino, iti balay ti biktima ngem awan ti simmungbat iti awagna. Idi simmirip ni Nartea iti uneg ti balay, nakitana laengen ti biktima a natayen.

Awan ti nasarakan ti SOCO team a kapsula wenno buli iti nakapasamakan ti krimen.

Di pay ammo no ania ti motibo ti pammapatay.

Kabayatanna, simmuko iti polis idi bigat ti Septiembre 13 ti suspek iti pammaltog sadiay Barangay Rang-ay, Sinait, Ilocos Sur idi rabii ti Septiembre 12.

Boluntario a simmuko ken ni Cabulalaan Barangay Captain Ruben I. Perez ni Reno Villa y Fariñas, 33, naasawaan, ex-CAFGU member, dati a residente iti Barangay Baracbac, Sinait ngem agindegen iti Barangay Cabulalaan. Nagkuyog ti kapitan ken ti katugangan ni Villa a dimmatag iti polis ti Sinait.

Adda pay laeng iti ospital ti baro a mapapati a ginandat ni Villa a patayen iti pagtunuan ti karne sadiay Barangay Rang-ay, Sinait idi 7:48 ti rabii ti Septiembre 12.

Nagsagrap ni Arnel Yacas y Encarnacion, 19, ken residente iti Barangay Marnay, Sinait kadagiti sugat iti akimbaba a paset ti pangana ken iti barukongna ket immuna a naitaray iti Corpuz Clinic and Hospital iti Sinait sa naiyalis iti Mariano Marcos Memorial Hospital and Medical Center iti Batac City, Ilocos Norte.

Saan a naan-ano ti kabsatna a ni Jeoffrey Yacas y Encarnacion, baro, addaan legal nga edad.

Innagananda ti pimmaltog a maysa a Reno Villa, mapapati a kameng ti CAFGU ken residente iti Barangay Baracbac, Sinait.

Segun iti inisial a panagimbestiga dagiti polis,  agur-uray da Jeoffrey ken ni Arnel iti kustomer a gumatang iti tinuno a karne iti sango ti Myrna’s Beauty Parlor a masarakan iti Barangay Rang-ay, idi immasideg ti maysa a lalaki a nakaaruat iti diaket ket kellaat a pinaltogan daytoy ni Arnel iti sumagmamano a daras.

Nagammatan ni Arnel ti suspek ket nakirupakda agra-man ni Jeoffrey ngem nagpa-putok manen ti suspek sa nagtaray nga immadayo iti laud a direksion.

Awan ti nasarakan dagiti inbestigador a kapsula wenno buli iti crime scene.

Iti pannakaisurat daytoy, di pay ammo no ania ti gapu a ginandat ni Villa a patayen ni Yacas.

Agtultuloy ti panagimbestiga dagiti polis mainaig daytoy a pammaltog.#

Comments are closed.