Footer

Marcos Day sinelebraran ti Ilocos Norte

ILOCOS NORTE – Sinelebraran daytoy a probinsia ti maika-95 a panagkasangay ti kangrunaan a paboritona nga anak, daydi Ferdinand E. Marcos babaen kadagiti nadumaduma nga aktibidad a nangipaay respeto kenkuana a nangrugi idi Septiembre 8 agingga iti  Septiembre 11.

Maangay-angay tunggal Setiembre 11, naikalawa ita a tawen ti selebrasion tapno maikkan dagiti bisita ken residente iti naan-anay a tiempo a makipartisipar kadagiti pagteng a nangitampok iti namaris a kabibiag ti paborito nga anak daytoy a probinsia.

Idi Setiembre 8, naangay ti Combat Shooters Fest sadiay Plaza Del Norte, Paoay, Ilocos Sur. Nasangaili kalpasanna dagiti lokal ken ganggannaet a dignitaries iti pangrabii iti Marcos Mansion, Batac City. Naangay ti maysa a concert a napanaganan ‘Da Real Makoy Concert’ a nagpabuyaan ti rock band “Draybers” iti Imelda Cultural Center, Batac City.

Napadayawan dagiti Barangay Peacekeeping Action Teams (BPATs) ti District 3 ken District 1 sadiay Imelda Cultural Center, Batac City  ken Sarrat Community Center iti Septiembre 8 ken 9.

Iti Septimebre 10, nailunsad ti Makoy Literary and Arts Contest iti Centennial Area, Laoag City. Paset ti programa ti pannakaiparang dagiti pelikula a nakaitampokan ti biograpia a “The Real Makoy” ken “Apo Lakay”.

Idi Septiembre 11, panagkasangay ni FEM, naangay ti thanksgiving mass iti Church of Immaculate Conception, Batac City, panangidaton iti sabsabong, ken panangipaay respeto dagiti miembro ti pamilia Marcos iti pimmusay a Presidente iti mausoleona iti Batac City.

Nailunsad met iti Malacañang of the North ti tallo a libro a pakairamanan ti libro ni Pearlie S. Baluyot a napauluan “Institutions and Icons of Patronage; Arts and Cultures of the Philippines During the Marcos Years 1965-1986” ken dadduma pay a libro a napauluan iti “Ferdinand E. Marcos and the Mindanao Enigma” a sinurat ni Samuel K. Tan ken ti “UpNorth”, libro a nakaurnongan dagiti salaysay.

Tampok pay iti daytoy nga aldaw ti panaglukat ti Malacañang of the North kas baro a museo a nakaipabuyaan saan laeng dagiti tawid ti pimmusay a presidente ken ni dati a First Lay Imelda Romualdez Marcos no di pay ti lifestyle ti pamilia Marcos.

Kinantaan ti Samiweng Singers, maysa a world class Ilocano choir, dagiti espesial a sangaili iti dinner reception iti panaglukat ti nasao a museo. (Karaman ti report ni Grazielle Mae A. Sales, CMO-PGIN)

Comments are closed.