Footer

Pagadalan, natakawan uray nakadlaw ti guardia

CERVANTES, Ilocos Sur – Adda naka-duty a guardia ngem saan a dayta ti lapped dagiti mannibrong a nagtakaw iti maysa a pagadalan ditoy nga ili idi parbangon ti Septiembre 13.

Dagiti personnel ti Saint Agnes School pay laeng ti nangireport iti polis ditoy a tinakawan dagiti di nabigbig a mannanakaw ti pagadalanda ket intaray dagitoy ti 13 a CPU, 7 nga LCD monitor, maysa nga amplifier, maysa a mixer, ken di ammo ti dagupna a kuarta manipud iti computer room ken faculty room.

Iti panagimbestiga dagiti polis, puersa a linuktan dagiti mannanakaw dagiti ruangan dagiti nasao a kuarto sada kinurimes dagiti napapateg a linaonda.

Segun iti report, nadlaw ni Allen y Cortez, 38, guardia, naasawaan, ken residente iti Barangay Concepcion idi agarup 1:00 ti bigat ti Septiembre 13 dagiti kanabtuog iti nasao a compound ken dagiti panagtataul dagiti aso ket nupay sinilawanna ti lugar, nagbuteng a mapan agsukimat agsipud ta awan ti armasna.#

Comments are closed.