Footer

Piknik nagtungpal iti pannakalmes

CABUGAO, Ilocos Sur – Nalmes ti maysa a baro bayat ti panagpipiknikda nga agkakabagian ken aggagayyem iti Arisodosod Falls iti Barangay Cacadiran, ditoy nga ili idi malem ti Septiembre 8.

Nainaganan ti nalmes a ni Michael Agtaguem y Addongay, 22, baro, ken residente iti Barangay Nagsingcaoan, ditoy met laeng nga ili.

Segun iti report, napan nagpipiknik ken naggiinom ti biktima, kaduana dagiti gagayyem ken kakabagianna iti nasao a lugar.

Mapapati a nagpatuktok ti biktima iti falls sa bimmaba ngem gapu ta nakainom, naidungpar iti maysa a bato a puon ti nakakaruskosanna iti dan-aw.

Nagpaarayat ti biktima ngem gapu iti napigsa a koriente, limned ket saanen a limmung-aw.

Inalaw dagiti nagresponde a PNP ken BFP personnel ti biktima sada intaray iti Pira Clini and Hospital ngem naideklara nga awanen ti biagna.

Nagsagrap ti biktima iti kammuol iti ulona ken garumiad iti abagana.#