Footer

Seal of Good Housekeeping, naiyawat iti LGU-Cabugao

CABUGAO, Ilocos Sur – Inawat ti gobierno munisipal ditoy ti Seal of Good Housekeeping, maysa a pammadayaw kadagiti lokal a gobierno a nasayaat ti panangiturayna, iti programa a naangay iti sango ti presidensia ditoy itay Septiembre 10.

Inawat ni Mayor Edgar S. Cobangbang, Jr., babaen ti panangbayabay kenkuana da Vice Mayor Danny Q. Gazmen, Konsehal Dr. Carlito S. Pano ken Konsehal Benedict M. Savellano ti Seal of Good Housekeeping  manipud ken ni DILG OIC Provincial Director Victoria H. Ramos kas panangbigbig ti nasao nga ahensia kadagiti programa ken gannuat dagiti opisial daytoy nga ili a mangital-o iti nasayaat a panangituray.

Ti pannakaited ti Seal of Good Housekeeping ti maysa kadagiti programa nga inrusat  daydi DILG Secretary Jesse Robredo tapno maikkan iti pammigbig dagiti lokal a gobierno a mangitantandudo iti pannakaipromot ti transparensia, akauntabilidad ken efficiency iti lokal a panangituray.

Kinuna ni Cobangbang a “kolektibo” a gapuanan dagiti agtuturay ken empleado iti Cabugao ti pannakagun-od ti Seal of Good Housekeeping.

Impatalged ti mayor ti agtultuloy a panangitedda iti napintas a serbisio kadagiti umili.

Karagpin ti pammadayaw ti P1 milion a premio a maipan iti proyekto ditoy nga ili.

Naammuan ti Tawid News a maaramat ti nasao a kuarta para iti pannakaipasdek ti covered drainage canal iti Barangay Bonifacio nga idauluan ni Barangay Captain Valentin Tuyor, Jr.

Maipalagip a babaen ti suporta ti lokal a gobierno ditoy ken iti pannakikinnamayet dagiti barangay officials ti nasao a barangay kadagiti gannuat ken proyekto ni BNS Macrina Saturno mainaig iti pannakaidur-as ti nutrision, napili daytoy a Most Outstanding Barangay Nutrition Scholar iti Region 1.

Awaten ni Saturno ti pammadayaw iti seremonia a maangay iti San Fernando City, La Union inton Septiembre 29.

Kas regional awardee, ibagian ni Saturno ti Region I iti pasalip a pakapilian ti Most Outstanding National Barangay Nutrition Scholar a mapadayawan inton Oktubre 19 daytoy a tawen.

Kabayatanna, naigiddan iti nasao a programa ti pannakaiyawat dagiti sertipiko ti pammigbig kadagiti empleado ti gobierno ditoy ken dagiti dadduma pay nga ahensia ti turay a nagserbi iti manipud iti lima a tawen ken agpangato.

Mismo a ni Civil Service Commission provincial director Heny Jose B. Lardizabal ken iti panangbayabay kenkuana ni Mayor Cobangbang ti nangiyawat kadagiti sertipiko ti pammigbig kas paset ti panangselebrar iti 112th Philippine Civil Service Anniversary a maang-angay iti bulan ti Septiembre.

Indagadag ni Lardizabal ti kinapateg ti panagserbi para iti pagsayaatan ti kaadduan.

Ti tema ti selebrasion ti CSS iti daytoy a tawen: “Altruism is an act of heroism.”#