Footer

2 asosiasion, naikkan iti pondo ti livelihood

CAOAYAN, Ilocos Sur – Dua a grupo ditoy nga ili ti inikkan ni Diputado Ryan Luis Singson iti pondo para iti proyektoda iti livelihood itay nabiit kas paset ti programana a mangtulong kadagiti lokal nga industria iti umuna a distrito ti probinsia.

Immawat ti Water Lily Handicraft Association ti Barangay Nansuagao ken ti Corn Husk Association ti Barangay Anonang Menor ti dua a nagsina a tseke nga agdagup iti P141,000 nga agpaay a pondo para iti panagaramidda kadagiti produkto manipud iti water lily ken ukis ti mais.

Inimatangan ni Mayor Gemma Singson-Goulart DTI Provincial Director Grace Lapastura ti pannakaiyawat dagiti tseke kadagiti dua nga asosiasion a nabuangay para iti pannakaitandudo ti One Barangay One Product program ti mayora.

Kinuna dagiti dadaulo dagiti dua nga asosiasion nga igatangda iti tools ken equipments ken inayonda iti kapitalda ti pondo a naited kadakuada.

Segun ken ni Marilou Atinaja, presidente ti Water Lily Handicraft Association, umad-adu metten dagiti negosiante a mapan agorder kadakuada kadagiti partuatda a sinelas, bags, basket, fruit tray ken dadduma pay a produkto manipud iti water lily.#

Comments are closed.