Footer

Agkabsat natiliwan nga agikut iti paltog

NARVACAN, Ilocos Sur – Tiniliw dagiti polis ti agkabsat gapu iti kaadda ti ikutda a paltog idi  rabii ti Septiembre 12 sadiay Barangay Bulanos, ditoy nga ili.

Nagturong dagiti polis iti nasao a barangay kalpasan a nakaawatda iti report nga adda di nabigbig a tattao a nagkalubbon iti motorsiklo nga agdakdakiwas iti Bulanos-Suvec road, ti nadakamat a barangay.

Mapapati a nagpaputok iti namitlo dagiti suspek idi makita dagiti polis sada naglibas a nagturong iti national highway.

Nangipasdek da PCI Joseph A. Fajardo iti checkpoint iti Barangay Paratong ket pinarada ti Yamaha Nouvo 125 a motorsiklo dagitoy ngem saan a nagsardeng dagiti suspek.

Kinamat dagiti polis dagiti suspek agingga a naipiskotda iti Barangay San Jose.

Nakakumpiska dagiti polis iti ikut ni Jovanie Pascual y Gutierrez, 23, iti maysa a cal .48 nga awanan iti serial number a nagkarga iti dua a bala ken 3 a kapsula.

Naipan ni Pascual agraman ti kabsatna a ni Aries, 19, agpada a residente iti Barangay Pantoc, Bucay, Abra, para iti dokumentasioin ken disposision.#