Footer

BANNER: Koalision ti Liberal Party, Bileg, nabuangay

VIGAN CITY – Mangrugin ti kutikuti ti politika ditoy probinsia para iti eleksion inton Mayo 2013.

Ditoy Ilocos Sur, inangay da Gov. Luis “Chavit” Singson ken ni dati a Deputy Speaker Eric Singson ti maysa a closed-door meeting a tinabunuan amin dagiti mamayor iti umuna ken maikadua a distrito ti probinsia para iti pannakapatalged ti koalision ti partido ni Presidente Benigno Aquino III iti partido Bileg ni Gov. Luis “Chavit” Singson.

Iti pannakiuman ni Singson iti lokal a media, inwaragawagna a nabukelen ti koalision ti Liberal Party ken Bileg Party nga idauluanna ket nagsapata payen dagiti dadduma a mamayor ditoy probinsia a sumallukob iti partido ni Pres. Aquino.

“Dagiti mabati ket koalisionton ti Liberal Party,” impalgak ti gobernador.

Kinuna ni Singson nga awan ti problema no isu ti kandidato ti koalision para gobernador iti masungad nga eleksion agsipud ta idi nangrugi a politiko, Liberal Party ti orihinal a partidona.

“Idi damomi ti nagtaray, Liberal Party ti orihinal a partidomi,” kinuna ni Singson idinto nga innayonna nagkaduada idi ken daydi Sen. Benigno Aquino, Jr.,  kas oposision iti Amianan maikontra iti grupo daydi nag-Presidente Ferdinand Marcos, Jr. Fidel Ramos, ken Juan Ponce Enrile.

Idi masaludsod no ania ti reaksionna mainaig iti panagsapata a kameng ti Liberal Party ti grupo da dati a Bokal Efren Rafanan, Sr. ken ni Tagudin Mayor Roque “Jun” Verzosa, Jr., insungbat ti gobernador nga awan ti makitana a problema iti dayta.

Kinuna ni Singson a nasayaat met no agkandidatoda tapno adda kasangoda iti masungad a bakal ti politika idinto nga inyunay-unayna a malaksid ti maysa, kaduana aminen dagiti mamayor iti probinsia.

Maal-alimadmad ditoy probinsia ti panagkaduan da Rafanan ken Verzosa ken ti posible a panangsangoda ken ni Singson iti masungad nga eleksion.

Dati a nasinged a kadua ni Singson da Rafanan ken ni Verzosa ngem nagsisinada iti dalan gapu met laeng iti politika.

Simmina ni Rafanan ken ni Singson kalpasan a saan a pinatgan ti gobernador ti tarigagayna nga agkandidato para gobernador iti probinsia ket ni agdama a Bise Gobernador Deogracias Victor Savellano ti intandudona.

Ni Savellano ti nangabak iti dayta nga eleksion.

Simmina met ni Versoza ken ni Singson iti presidential election idi 2010 agsipud ta kas maysa a dadaulo ti Partido Liberal iti probinsia, ni Aquino ti sinuportaranna a kandidato idinto a ni Sen. Manuel Villar ti minanok ni Singson a nagkandidato para gobernador iti babaen ti Bileg Party.

Ad-adda a rimmaba ti langenlangen da Singson ken ni Verzosa, dati a trouble shooter ti gobernador kadagiti OFWs nga agkaproblema iti panagtrabahoda iti sabali a pagilian sakbay a nagmayor iti Tagudin, gapu iti isyo ti mapapati a panag-quarry iti nagbeddengan ti Tagudin, Ilocos Sur ken iti La Union.

Kinuna ni Singson nga iti panagpatangda ken ni DILG Secretary Jesse Robredo sakbay a natay gapu iti pannakaikras ti naglugananna nga eroplano, nadakamat ti sekretario nga imbilin ti Presidente ti panagaaregloda iti probinsia.

“Imbagak a suportaranmi ti ngato ngem mangipatakderkami iti bukodmi a kandidato iti baba,” kinuna ni Singson.

Kinuna pay ni Singson a saan nga agsapata dagiti mayor iti umuna a distrito  a kameng ti Liberal Party agsipud ta mapukaw ti accreditation ti Bileg a kas political party, isu a tumipondanto laengen iti koalision.#

Comments are closed.