Footer

Nagtagiarmas a grupo a nangkamat iti trabahador, kameng ti NPA?

STA. MARIA, Ilocos Sur – Kameng ti lokal a komunista a terorista dagiti armado a tattao a nangkamat iti napabutngan a kontratista iti Bantay Gusing?

Kamengda man iti NPA wenno saan, saanen a kayat pay ni Rodolfo Quindipan, 59, residente iti Barangay Villamar, Caoayan, Ilocos Sur, ken dagiti uppat a pulo a kalugaranna ti agsubli pay iti Bantay Gusing tapno agkalida iti abut a pagmulaan iti kayo gapu iti kaadda dagiti nagtagiarmas a tattao a nagdakiwas iti disso a nagkampuanda.

Segun ken ni Quindipan,  pannakadadaulo ti grupo, saanen a kayat dagiti 40 a kalugaranna ti agsubli pay nga agkali iti abut a pagmulaan iti kayo iti nasao a bantay agsipud iti dakes a kapadasanda  idi damo a rabiida kalpasan ti panagtrabahoda iti nagmalem.

Nakaawid met laeng ni Quindipan kalpasan ti nagpatnag ken nagmalem a mapapati a panangkamat kenkuana dagiti nagtagiarmas a tattao a nangburak iti grupoda iti immiananda a lugar.

Kanaig daytoy, nagyaman ni Quindipan ken ni Mayor Germie Singson-Goulart iti madagdagus a panagtignayna a mangpasapul kenkuana idi naidanon kenkuana ti napasamakda iti bantay.

Iti interbio kenkuana ni Jun Ramos, anchorman ti Barangay Commando Brigada, insalaysay ni Quindipan a kinontrata ti maysa a Florencio Soliven, empleado ti Department of Environment and Natural Resources nga agkalida kadagiti abut a pagmulaan dagiti estudiante iti seedlings iti nasao a bantay ket mabayadanda ken dagiti kakaduana iti P130 kada aldaw ken libre ti pammigat, pangaldaw ken pangrabiida.

Dua a lawas ti inkontrata ni Quindipan a pannakalpas iti panagkalida.

Rinugian da Quindipan ken dagiti kalugaranna ti nagtrabaho apaman a nakasangpetda iti bantay idi aldaw ti Septiembre 19.

Kas insalaysay ni Quindipan, agin-inanadan kalpasan ti pangrabii idi kellaat a nakakitada kadagiti adu a silaw nga umas-asideg iti yanda.

Iti butengda, tunggal  maysa nagsipaglemmeng ket naisina ni Quindipan kadagiti kakaduana.

Segun ken ni Quindipan, saan a sininaan a sinursurot dagiti nagtagisilaw ken nagtagiarmas a tattao ket iti agarup ala una ti parbangon, nasurotna  ti dalan a mapapati a nagnaan ti danum ngem adda latta nga immip-ipus ti bunggoy ken mangsilsilaw  kenkuana.

Mapapati a sinursurot latta dagiti armado a tattao ni Quindipan uray iti nagmalem ti Septiembre 20 agingga a natuntonan dagiti polis a naibaon a mangsapul kenkuana.

Nagpukaw kano metten dagiti mangsursurot kenkuana idi addan dagiti polis.

Nagsubli da Quindipan iti nagkampuanda sada nagkukuyog met laeng a naggawid.

Kinunana a sangapulo ket uppat a kalugaranna ti immunan a naggawid gapu iti amakda.

Nupay kasta, saan a maibaga ni Quindipan no kameng ti lokal a komunista a terorista  wenno soldado ti turay dagiti nangsursurot kenkuana wenno dagiti agsilaw iti tukak, kas mapapati a sinao ti maysa kadagiti armado a tattao kadagiti nabati a kalugaranna iti nagkampuanda.#

Comments are closed.