Footer

NEGO Kart project, maipaay kadagiti ambulant vendors

VIGAN CITY – Inaprobaran ti sangguniang panlungsod ditoy ti maysa a resolusion a mangted otorisasion ken ni Mayor Eva Marie S. Medina a sumrek iti katulagan iti Department of Labor and Employment para iti pannakaipasdek ti NEGO Kart project ditoy siudad.

Sinaguday ti resolusion nga nagbuligan nga indatag da SPM Janina M. Fariñas ken SPM Loreto A. Quibilan ti pannakitulag ni Mayor Medina iti DOLE nga ibagian ni Regional Director Grace V. Ursua tapno maipasdek ti NEGO Kart project iti siudad para iti livelihood dagiti ambulant vendors nga aglaklako iti fishball, bibingka ken dadduma pay a merienda iti siudad.

Kinuna ni Fariñas a kas sagudayen ti MOA, agdagup iti P15,000.00 ti maited tunggal ambulant vendors –  P12,000.00 ti para iti NEGO Kart, P2,500.00 ti maiyalokar para iti working capital ken P500.00 para iti panagsanayda.

Innayonna nga agtaud ti 80% iti mabusbos iti DOLE idinto a 20% ti ibaklay ti city government.

Mapili dagiti taga-Vigan City a resipiente iti nasao a proyekto babaen ti City Social Welfare and Development Office. Nupay kasta, ti gobierno ti siudad ti mang-assess ken mangirekomenda kadagiti aglako a makasapul unay iti pagsapulan.

Addan nabuangay a verification committee para kadagiti indigent a residente ditoy Vigan City a binukel dagiti miembro dagiti nadumaduma a nongovernment organizations ken dagiti empleado ti city government.

Paset pay ti programa ti panangtulong ti city government kadagiti resipiente a mangala iti permitda.

Kinuna pay ni Fariñas nga agsanayto dagiti resipiente iti NEGO Kart project  iti business skills ken entrepreneurship ket mangnamnama nga agballigi dagitoy iti negosioda.

Sangsangkamaysa dagiti konsehal a nanganamong iti nasao a resulosion.#