Footer

NUTRITION NEWS: Panagpasuso dagiti inna naiyunay-unay

CANDON CITY – Naiyunay-unay kadagiti masikog nga inna ti breastfeeding tapno nasalsalun-at ti anakda bayat ti culminating program sadiay K Servico Store iti San Agustin ditoy siudad itay nabiit.

Timmabuno iti nasao a programa dagiti agarup 50 a barangay nutrition scholars (BNS) ken masikog nga inna babaen ti panangisayangkat ti City Nutrition Office nga indauluan ni City Nutritionist Nimfa Pascua ken ti pannakikammayet ti Candon City Farmers Health Center.

Tallo a doktor a babbai a pakaibilangan da Dr. Joy Villanueva, assistant city health officer ti Candon, Dr. Rogielyn Gilera, pediatrician iti Candon City Hospital, ken Dr. Noreen Escobar, OB-Gyne ti Candon City Health Center, ti nagsarita iti nasao nga okasion mainaig iti kinapateg ti panagpasuso dagiti inna para iti nasalsalun-at nga anakda.

Imbinsabinsa ni Dr. Gilera ti kinapateg ti breastfeeding parti-kular iti sustansia a maala dagiti maladaga manipud iti suso ti inada.

Inlawlawag met ni Escobar dagiti kasapulan a sustansia dagiti masikog tapno nasalun-atda ken ti agbalin nga anakda.

Sakbay ti culminating program, immun-una a nagbarabarangay dagiti barangay nutrition scholars, kaduada ti nutrition office tapno ikampaniada ti panagpasuso dagiti inna ken ti panangilawlawagda iti umno a nutrision para iti nasalun-at a bagi. (Danny Antalan)

Comments are closed.