Footer

Ti Legacy ni DILG Sec. Jesse Robredo

Ni  Danny B. Antalan

 

 

Sakbay idi Agosto 18, 2012, adu dagiti di makaam-ammo kenkuana.  Dagiti taga-Naga City laeng ti makaam-ammo kenkuana.  Asino aya ni Jesse Robredo?  Ahhhh, isuna ti sekretario ti Department of Interior and Local Government wenno DILG, kunada idi.  Intono kuan, malipatanda manen, nalaklaka ketdi a matandaan ti nagan ken rupa ni Justice Secretary Leila de Lima ta inaldaw a linaon ti damag.

Ngem idi kuan, nadisgrasia.  Manipud idiay Cebu, natinnag ti naglugananna a bassit a Piper Seneca plane iti baybay ti Masbate.  Nagsuek ti eroplano iti kauneg a 180 feet.

Natay ti sekretario!  Nairaman a natay dagiti dua a piloto ti eroplano.  Adda maysa a nakalasat, ni P/Senior Inspector Jun Abrazado.

Nangrugi ditan a naipigket ti mata dagiti umili iti napasamak. Idi unana ket ti laeng natinnag nga eroplano ti nangagaw ti imatangda; idi kuan, naipadamag a maysa a sekretario ti ahensia ti naglugan; idi agangay, naammuanda ti nagan a Jesse Robredo… nangdegdeg iti riknada ti saan a pannakabirok ti nagsuek nga eroplano.  Binuybuya dagiti umili ti panangbirok dagiti rescuers kadakuada, no sibibiagda pay laeng wenno nataydan.  Kalpasan ti sumagmamano nga aldaw, nasarakan ti eroplano… iti unegna, adda ni Robredo… maysan a nalamiis a bangkay.

Nagsangit ti administrasion Noynoy Aquino iti pannakatayna.  Nagsangit dagiti mangay-ayat kenkuana a kapamiliana.  Idi agangay, nagsangit ti sibubukel a pagilian a Pilpinas.

Wen, nagsangit dagiti Filipino, nangruna idi naammuanda a maysa a nalinteg a pulitiko, nasingpet nga ama ken asawa, pagwadan nga agserserbi iti gobierno.

Saan a dagiti dakes nga inar-aramidna iti panagtakemna ti rimmuar.  Rimmuar dagiti napipintas a gapuananna, nangruna idi nagtakem a kas maysa a mayor idiay Naga City.  Naidaydayaw ti panagtsin-tsinelasna, ti panagbisbisikletana, ti panagpagnana iti eskinita, ti nasapa a panagopisinana, ti panagatendarna iti PTCA meeting ti anakna, ti pannakimisana… ken dandani amin a napintas a galad a naikabit kenkuana.

Naitanem kas maysa a bannuar!  Apagisu, ta iti dayta a lawas, ramrambakan ti sangkapagilianan ti National Heroes Day.

Apay a kasta la unayen ti panakaitandudunona?  Kayatna a sawen kadi a kasta kakisang dagiti nasisingpet a pulitiko iti Pilipinas? Nga awan kadin ti de-kalidad a pulitiko iti agdama? Ket agbirbirok dagiti umili iti idolo nga itandudoda?  Ket naragsakanda, ta iti rinibribu a pulitiko ken agserserbi iti gobierno, adda maysa a naisalsalumina kadakuada.

Siguro, naragsakan dagiti tattao, ta kalpasan ti sumagmamano a tawen, napukaw apagbiit iti panunotda a ti pulitiko ket kaibatoganna lattan ti buaya, kurakot, gamrud, mananggundaway, SOP, impluensia, suitik ken dadduma pay.  Naragsakanda, ta gapu ken ni Robredo, nabaliwan apagbiit ti kayat sawen ti pulitiko…  agserserbi iti gobierno—tumulong iti umili a sipupudno.

Iti dayta, kayatdan a maitanem koma iti Libingan ng mga Bayani.

Ti tsinelas a gobiernona ti maysa a nakatukayan dagiti umili kenkuana.  Naka-tsinelas ngamin a mangpaspasiar kadagiti umilina idiay Naga tapno ammuenna dagiti problema ken kasapulanda.  Naka-t-shirt laeng a magmagna iti kalsada nga awan ti sumursurot a nabaneg a bodyguard.  Saan a nakalugan iti nagamar a sasakayan, ad-adda ketdi a makitada iti bigbigat nga agbisbisikleta bayat ti ehersisiona.  Awan ti mangpaypayong kenkuana. Awan ti para ited iti alcohol iti imana.

No kasta a tao ti agserbi kenka, saanka ngarud agamak nga umasideg a mangibaga iti problemam, ta ngamin kasla saanka a sabsabali kenkuana.  Agpadakayo laeng a nakabaddek iti daga.  Ken  mariknana ti tunggal balikas nga iyarungaing kenkuana.

Imbes a pagpabongga a pondo, ilatangna laengen a pagimbagan ti masakupanna.

Dayta ti pudpudno a kayatna sawen ti… nanumo nga agserbi kenka… ngem nabaknang ti serbisio nga ipaayna.

Maiduma la unay kadagiti dadduma a pulitiko nga arig pagbalinenda a personal account ti kuarta ti iturturayanda.

Pagsayaatanna, adu unay ti nainspiraran kenkuana, saan laeng dagiti indibidual a tattao, no di ket karaman dagiti gobierno iti nadumaduma a purpuro iti Pilipinas.

Nainspiraranda tapno iruarda ti serbisioda.  Adu ti nangibaskag iti kasasaad ti gobiernoda.  Adu ti nangireport kadagiti umilida ti nakaigastuan dagiti pondo ti gobierno.  No ania dagiti proyekto a nangipananda.  Ania dagiti inar-aramidda iti unos ti maysa a lawas, maysa a bulan wenno maysa a quarter.  Implastarda dagiti naggastuan ken napastrek.

Ngem siempre, dagiti nangiruar iti kasta ket dagiti awan ilemlemmengna.  Ngem kadagiti gobierno nga adda agat-baraniw a kontrata wenno gapuananna, bay-am man dayta transparency-transparency a kunada.

Narigaten ti mabuking.

Ngem at least, kas kunak, adda dagiti nainspirar ken ni Robredo tapno aramidenda daytoy.  Maysa nga addang a bareng maitultuloy dagiti agtutubo nga agbalinto a pulitiko.

Ta mamatiak met a saan laeng a ni Robredo ti mapagwadan iti gobierno.  Nairana laeng a ni Sekretario Jesse ti nagbalin nga eye opener kadagiti dadduma.  Wen, adda pay dagiti nasisingpet dita.  Ngem manmano laeng ngata.

Daytoy ti legacy ni Robredo iti gobierno.  Daytoy ti Robredo effect.  Ti gobierno iti tsinelas – nalitnaw a kas iti danum ti panagtaray ti pundo ken serbisio.

Ngem apay ketdi, a sa la makita dagita a bannuar no nataydan.  Kas ken ni Rizal.  Kas ken ni Robredo.#

Comments are closed.