Footer

2 lalaki a nagimet iti paltog, nakasuan

VIGAN CITY – Dua a lalaki ti nakasuan iti opisina ti city prosecutor ditoy gapu iti panaglabsingda iti R.A. 8294 kalpasan a nasukalanda a nagikut iti paltog idi Septiembre 26.

Naaresto idi rabii ti Septiembre 25 da Renato Madriaga y Aldeza, 25, baro, natibo ti Barangay An-annam, Bantay, Ilocos Sur ngem aggigian iti agdama iti Barangay Arnap, San Ildefonso, gapu iti mapapati a panagikutna iti homemade 12 gauge shotgun; ken ni Loreto Datu y Dasalla, 61, naasawaan ken residente iti Barangay Pantay Daya, ditoy siudad gapu iti panagikutna iti cal. 38 revolver.

Pinasardeng dagiti polis nga indauluan ni P/Inspector Aljun Baranda Belista ti Lipan a motorsiklo a minaneho ni Joel Madriaga y Alamar, 34, baro, ken residente iti nadakamat a barangay iti impasdekda a checkpoint iti Quezon Avenue, Barangay 1, Vigan City ket nasiputanda ni Madriaga a dimsaag sa napan iti trashcan iti abaga ti kalsada a mapapati a nakaiggem iti homemade 12 gauge shotgun.

Dagus nga inaresto dagiti polis ni Madriaga sada impan iti Vigan City police station.

Iti sabali nga insidente, nagturong dagiti polis iti Meding’s Videoke Bar kalpasan a nakaawatda iti report manipud iti guardia ti Vigan City Skills Training Institute nga adda lalaki a nakaarmas iti paltog iti nasao a paginuman.

Inaresto dagiti polis ni Datu idi nakitada nga adda sabbikel daytoy a cal .38 nga  addaan iti 6 a bala iti cylinder.

Naipan met ti suspek iti police station kalpasan a naisayangkatan iti mediko legal iti Vigan City Health Office.

Nakasuan ni Datu iti illegal possession of firearm and ammunition kalpasan ti inquest proceeding iti opisina ti Vigan City prosecutor.

Kabayatanna, inaresto met dagiti polis ti Candon City ti maysa a baro gapu iti mapapati a panagpaputokna sadiay Barangay Parioc 2nd idi rabii ti Septiembre 26.

Inaresto dagiti polis ni Richard Garabiles y Molina, 19, baro, kasta met dagiti kakaduana a nainaganan Lando Garabiles y Bambico, 43, naasawaan; Eddie Garabiles y Milian, 42, naasawaan; Norman Alcantara y Garabiles, 17, baro, agpapada a  residente iti Barangay Parioc 2nd, Candon City; ken ni Jay-ar Molina y Molina, 20, baro, ken residente iti Barangay Baballasiwan, Sta. Maria.

Nagturong dagiti polis iti Barangay Parioc 2nd idi nakaawatda iti tawag iti telepono iti agarup 9:02 ti rabii ti nasao a petsa nga adda nagpaputok sadiay, nangruna iti compound dagiti Garabiles a paggiinumanda.

Idi asidegen dagiti polis, nakitada ti maysa a lalaki nga aglalaaw ken kumarkarit iti kinnabilan.

Sumagmamano a kanito, tallo a lallaki a nakasakay iti tricycle ti rimmuar iti compound ket pinasardeng dagiti polis.

Mapapati a pinaturongan ida ni Richard Garabiles iti paltog ket idi nagpabigbig dagiti polis, indisso ti suspek ti armasna iti karuotan a paset ti dalan.

Imbilin dagiti polis ti panagpakleb dagiti suspek sada narikisa ngem awan ti nasukalanda pay a sabali nga armas dagitoy.

Naipaiman ti record ti kaso a panaglabsing iti RA 8294 maikontra ken ni Garabiles iti City Prosecutor’s Office.#

Comments are closed.