Footer

Absentee a konsehal, naireklamo gapu iti dina panagipila iti SALN

CABUGAO, Ilocos Sur – Sabali manen a problema ti sanguen  daytoy managlangan a konsehal a naireport a nasuroken a sangapulo a lawas a saan a nakisession iti sangguniang bayan ditoy nga ili.

Ita, mismo a ni Mayor Edgar S. Cobangbang, Jr. ti nangireklamo ken ni Konsehal Richard Alcid iti sangguniang panlalawigan gapu iti mapapati a saanna a panagipila iti Statement of Assets and Liabilities and Networth, kas intuding ti linteg nga ipila dagiti opisial ken empleado ti gobierno.

Naipaima ti reklamo iti Blue Ribbon Committee nga idauluan ni Bokal Orlino Tesoro. Nupay kasta, kiniddaw ni Tesoro ti pannakai-defer ti nasao a reklamo bayat ti panangadal pay ti komite nga ipanguluanna.

Indagadag ketdi ni Tesoro ti pannakaiwayat ti maysa a dialogo iti nagbaetan da Cobangbang ken ni Alcid mainaig iti nasao a reklamo.

Nupay imbaga ni Cobangbang a sisasagana a makidialogo ken ni Alcid, imbatadna a masdaaw la ketdi no makapan ti konsehal iti Vigan nga ad-adayo nga amang ngem iti munisipio nangruna ti sangguniang bayan a linangananna a pakisessionan iti nasuroken a sangapulo a lawas.

Sabali pay ti reklamo maikontra ken ni Alcid ti naidatag iti sangguniang panlalawigan mainaig iti nasuroken a sangapulo a lawas a deretso a dina pannakisession iti sangguniang bayan.

Ni Vice Mayor Danny Gazmen ti nagpirma iti reklamo  kas complainant for and behalf ti sangguniang bayan.

Nagbalin a sakit ti ulo dagiti konsehal ti saan a pannakisession ni Alcid agsipud ta naapektaran dagiti komite a pagtsermananna. Ni Alcid ti chairman ti committee on finance and appropriation ken transportation and communication, dua a napateg a komite.

Napag-aanamongan dagiti konsehal ti pannakaiteden dagitoy a komite iti sabali ket tratarenda daytoy iti sumarsaruno a session.

Nagbalin pay a problema ti sangguniang bayan no adda bilegna a mangdisiplina ti maysa a konsehal a naglangan iti session iti nagsasaruno nga uppat a lawas iti baet nga awan ti nakalanad iti internal rules and procedure.

Ngem segun ken ni DILG OIC Provincial Director Victoria Ramos, uray saan a naipalaon iti IRP, mabalin nga aramaten ti sangguniang bayan ti bileg ti Local Government Code tapno madisiplinaan ti maysa a managlangan a konsehal; kasta met a  mabalin ti sangguniang bayan ti agreklamo maikontra iti nasao a konsehal  ket iti sanguanan ti kaawan ti nailanad iti IRP a pannakadusana, ti sangguniang panlalawigan ti maituding a disciplining authority.

Dinakamat ni Ramos ti Section 60 ken 61 ti Local Government Code a pakabirokan dagiti grounds iti pakasuspensuan wenno pakaikkatan ti maysa nga elective local official.

Inikkat dagiti konsehal ditoy ti probiso iti IRP a mangituding iti panagmulta wenno pannakadusa ti konsehal nga aglangan iti session nga awan ti dakkel a rason agsipud ta “honorableda” ket iti pammatida, awan ti makaaramid iti kas iti inaramid ni Alcid.

Maipalagip a naikkat iti puesto ni dati a Supreme Court Chief Justice Renato Corona gapu ta napaneknekan bayat ti impeachment trial  a nagpaayan ti Senado a kas impeachment court iti dina panangideklara amin dagiti sanikua ken depositona iti bangko iti SALNna.#

 

Comments are closed.