Footer

BANNER NEWS: Paktoria ti sigarilio rinaut ti NBI, polis; rinibribu a peke a sigarilio nasamsam

BANTAY, Ilocos Sur – Maysa a paktoria ti sigarilio sadiay Barangay Ora ditoy nga ili ti rinaut dagiti nagtipon a bunggoy dagiti operatiba ti National Bureau of Investigation ken ti polis ditoy nga ili idi Septiembre 26 a nakasamsamanda kadagiti rinibribu a peke a sigarilio ken makina a pagpartuat iti sigarilio.

Nakasamsam dagiti nagtipon a bunggoy ti NBI, Manila nga indauluan ni (HA) Rommel J. Vallejo, Chief Intellectual Property Rights Division ken Special Investigator IV Carlos N. Borromeo babaen ti koordinasion ti NBI, Vigan City ken dagiti polis ti Bantay iti paktoria sadiay Barangay Ora iti 11,128 packs a counterfeit a sigarilio nga addaan brand name a   “Peter Stuyvesant”; 90,000 sticks ti peke a “Peter Stuyvesant”; 7 rolio ti “Peter Stuyvesant” stickers; 196,820 empty packs nga addaan label “Peter Stuyvesant; 1 box a shipping label nga addaan markings a “Peter Stuyvesant”; 810 empty master cases nga addaan label “Peter Stuyvesant”; 1 unit ti stamping machine, ken eight component parts ti nadumaduma a makina a naaramat iti panagpartuat iti peke a “Peter Stuyvesant” cigarettes.

Kanaig daytoy, kinuna ni Gov. Luis “Chavit” Singson a naminduan a naraut ti nasao a paktoria dagiti peke a sigarilio.

Innayon ti gobernador a nabayagen nga imbilinna iti Bureau of Customs ti pannakapaserra daytoy a paktoria.

Imet ti raiding team ti Search Warrant No. 12-20390 gapu iti panaglabsing iti Sec. 68 (Unfair Competition) ken Search Warrant No. 12-20391 gapu iti panaglabsing iti Sec. 169.1 (False Designations of Origin; False Description or Representation) kas sinaguday ti Sec. 170 ti RA 8293 idi rinautda ti nasao a paktoria a mapapati nga imatonan da David Sy, Johnson Sy, ken dadduma a direktor/opisial ti Metro Tobacco Corporation.

Ni Acting Presiding Judge Lyliha L. Abella-Aquino ti RTC, National Capitol Region, Manila, ti nagpirma kadagiti nasao a search warrants.

Sinaksian da Barangay Captain Victoriano Pantaleon ken Barangay Kagawad Dennis Gaspar ti pannakaresibo ken pannakainbentario dagiti nasamsam a sigarilio ken makina iti nasao a paktoria.

Naikarga dagitoy iti maysa a truck a nagluganan ti bunggoy a napan iti Manila.

Ditoy Ilocos Sur ti kadakkelan ti produksion iti Birhinia a tabako ken kadakkelan iti bingay iti excise tax manipud dagiti sigarilio a mapartuat ditoy pagilian kas intuding ti RA 7171 a pinutar ni Singson idi isu ti diputado a mangibagi iti umuna a distrito ti Ilocos Sur.#

Comments are closed.