Footer

Biktima ti pammagsol, bangkayen idi masarakan

CANDON CITY – Idi adda mangegna nga ikkis manipud iti kaarrubada a balay, nagbuteng ti saksi nga immasideg agsipud iti amakna a mairamraman ket natungday ti posible koma a pannakaisalakan ti biag ti biktima.

Segun iti report manipud iti polis ditoy, naduktalan ti pammagsol idi nasarakan ti akinkukua iti balay a ni Josefina Arata, 63, balo, residente iti Barangay San Nicolas ditoy siudad a maysan a bangkay ti katulongna a ni Maria Teresita Pelayo y Manzano, 47.

Nagsagrap ni Pelayo iti innem a bagsol iti barukong ken tianna ken garumiad iti takiag ken sakana.

Iti panagimbestiga dagiti polis, idi agarup 11:30 ti aldaw ti nadakamat nga aldaw, nakita ti di nainaganan a saksi ken kaarruba ti biktima ti maysa a lalaki a butiog, nakaaruat iti gray t-shirt, agtayag iti  5’6″ agingga 5’7″ a sipapardas a simrek iti akinlikud a paset ti kaarrubada  a balay ket kalpasanna, nakangeg iti ikkis.

Mapan koma agusisa ti nasao a kaarruba ngem dina pinatuloy agsipud iti amakna a mairamraman isu a nagsubli iti balayna ket intuloyna ti nagbuya iti TV.

Idi agarup 12:30 ti malem, simmangpet ni Arata ket nadatnganna a bangkayen ti katulong a naidalutayray iti sanguanan ti ridaw ti kusina.

Nakasarak dagiti inbestigador ti SOCO iti nakapasamakan ti krimen iti kitchen knife nga agatiddog iti sumurok-kumurang 12 pulgada agraman ti pangiggaman a mapapati nga inaramat ti di nabigbig a suspek.

Awan ti nadistrungkar a sumrekan iti balay ken awan ti naireport a mapukpukaw.

Iti pannakaisurat daytoy, di pay ammo ti motibo ti pammagsol.

Kabayatanna, binagsol ni Ricardo Norberte, ti kabsatna a ni Jojo Norberte y Dominecma, 34, naasawaan, tricycle driver, agpada a residente iti Barangay Taliao, Burgos, Ilocos Sur a nagramut iti dida panagkinnaawatan idi agarup 11:00 ti rabii ti Septiembre 22.

Naitaray ni Jojo iti Central Ilocos Sur District Hospital gapu iti bagsolna iti bukotna.

Segun iti polis, sinurot ti suspek ti kabsatna iti ospital ket nagprobokar idinto nga inwagwagisna ti imuko a mapapati a pinangbagsolna iti kabsatna.

Inaresto dagiti polis ti suspek sada impan iti police station. Rimmuar met laeng ni Jojo iti ospital kalpasan ti pannakaagas ti sugatna.

Saan a nailanad iti blotter no ania ti nagsusikan dagiti agkabsat.#

Comments are closed.