Footer

Lying-in clinic nainagurar

CABUGAO, Ilocos Sur – Nainaguraran itay Septiembre 28 ti agpateg iti P2.3 milion a lying-in clinic nga indonar ti maysa nga anak daytoy nga ili ngem agnaeden iti ballasiw-taaw.
Mismo nga inatenderan ti ama ti probinsia, ni Gov. Luis “Chavit” Singson ken ni Vice Gov. Deogracias Victor “DV” Savellano ti naggiddan a pannakabendision ti lying-in clinic ken ti rural health unit.
Ti pannakapaadda ti lying-in clinic ditoy nga ili ti maysa kadagiti prioridad a proyekto ni Mayor Edgardo S. Cobangbang, Jr.
Iti immun-una nga interbio ni Cobangbang iti Tawid News Magasin, kinunana nga inggiddanda a pinatarimaan ti rural health unit kas counterpart ti munisipio iti pannakaipatakder ti lying-in clinic nga indonar ni Dr. Charlie Sonido ken ti pamiliana.
Ti pamilia Sonido ti nangibaklay ti nabusbos iti pannakaipatakder ti lying-in clinic nga agdagup iti P2.3 million para iti nasaysayaat a serbisio ti salun-at kadagiti umili ti Cabugao.
Kinuna ni Cobangbang a kumplementaran met ti Cabugao Sons and Daughters ti agpateg iti $10,000.00 nga equipments a maikabil iti RHU.#

Comments are closed.