Footer

Motorista, napapatay iti dalan

NARVACAN, Ilocos Sur – Maysa a lalaki ti napapatay iti sanguanan ti rice mill sadiay Barangay San Pedro ditoy nga ili idi malem ti Septiembre 24.

Dagus a natay ni Erickson Doles y Dasalla, 30, awanan pagsapulan, naasawaan ken residente iti Barangay Nagsayawan, Sta. Maria, Ilocos Sur gapu kadagiti sugatna iti rupa.

Segun iti report manipud iti polis, insardeng ni Doles ti motorsiklona a Honda Wave iti sanguanan ti Marlyn Ciubal Rice Mill ngem kellaat a nagparang ti di nabigbig a suspek sana pinaltogan ti biktima iti namindua a daras sa naglibas iti di ammo a direksion.

Saan a naan-ano ti kasakayna a ni Niño Remar Andion, 20, baro, ken kalugaranna.

Nakasarak dagiti polis iti dua a kapsula manipud iti cal. 45 iti nakapasamakan ti krimen.

Madama ti panagimbestiga dagiti polis no ania ti motibo ti pammapatay.#

Comments are closed.