Footer

Panawenen a mapaksiat dagiti lolong iti gobierno

Komentario ni Melvin Bandonil

 

Lolong ti pangawag kadagiti kurap nga opisial ken empleado iti gobierno. Naadaw daytoy a nagan iti kadakkelan a buaya iti sangalubongan a natiliw sadiay Agusan. No lolong, dakkel ken nataba ngarud a buaya. No sumikbab, nakaam-amak ken saanna nga ammo ti agparbeng. Sikbabenna amin nga inna pakairanudan. Sikbab a sikbab, kasla saan a mabmabsog. Mangirarit ken mangiramraman kadagiti magmagna iti nalinteg a dana.

Adu dagiti lolong nga agdakdakiwas, manglimlimo a karnero, nakabarong ngem aguy-uyaoy ti ipusna nga atiddog—uray an-annuem a kawesan ti lolong, lolongto latta.

Ngem mabalin a pugipogen ida babaen ti panagikkat kadakuada iti takem. Bagbagaan ida ket no saanda pay la nga agnakem, umno laeng nga ikkaten ida iti takem. No saanda a maikari nga agserbi, apay ketdin nga addada pay la iti ahensia nga agisaknap iti kinatiri?

Kastoy ti inaramid a panagdalus dagiti dua nga ahensia ti gobierno. Serioso ken istrikto a tignay. Inikkatda dagiti sumagmamano laeng a nadadael a bunga iti uneg ti basket sakbay a maalian dagiti saan pay a nadadael. Serioso a panagdalus.

Kastoy ti inaramid ti Bureau of Immigration (BI) nga idauluan ni Commissioner Ricardo A. David, Jr. ken ti Bureau of Customs (BoC) nga idauluan ni Rozzano Rufino “Ruffy” B. Biazon.  Dagitoy dua nga ahensia ti paborito a pagaponan dagiti adu a lolong ken mangdaddadael iti napintas nga imahe dagiti  ahensia nagruna ti gobierno.

Kasapulan ti gobierno a naitikleben ti bumangon ken umaddang manen nga agturong iti namnama. Nasken ti reporma isu a kasapulan ti panangpugipog kadagiti nagapon a lolong ta isuda ti mangipapaay iti nalaad nga imahe ti gobierno. Agpayso, saan a lolong amin nga empleado – sumagmamano laeng. Adu pay laeng dagiti napudno nga agserbi iti ili.

Iti Bureau of Immigration, inikkatdan ti 36 nga immigration officers a natakuatan a naglabsing ken sinuspensoda pay ti sabali pay a 41 nga immigration officers gapu kadagiti nagduduma a kaso a nakaimbolbaranda.

Napasamak amin dagitoy sipud pay idi napan a tawen ken babaen ti panangidaulo ni Comm. David, a sipursige a nagimbestigar kadagiti administrative complaints kontra kadagiti immigration officials ken empleado.

Addan impasdek ni David a complaint redress section a mangasikaso kadagiti arungaing ken reklamo kadagiti lolong nga empleado. Lalo kadagiti natured a ageskort kadagiti ‘nakaabungot’ a persona ken VIP  a rummuar ken umuneg iti pagilian.

Impursige ni David ti ‘kinapropesionalismo’ iti bureau’s ranks. Ti BI ti kaunaan nga ahensia a nangisubmitar iti enhanced performance management system iti Civil Service Commission tapno maadal ken maitag-ay pay ti performance dagiti empleado. Sinelebraran ti ahensia ti maika-72 a tawenna idi Setiembre 1.

Iti Bureau of Customs, aktibo met iti kampania ni Biazon kontra kadagiti ismagler ken importer/exporter a saan a nangited iti umno a deklarasionda kadagiti imported a produkto/tagilako nga iserrekda ditoy pagilian ken pagpukawan ti gobierno iti minilion iti rumbeng koma a buis a sumrek iti kahana. Addan sumagmamano a natiliwda a nagkusit a pakaibilangan ti naapputda a sinakosako a bagas nga agpateg iti kagudua a billion. Nasuspenden ti nangato nga opisial a maysa nga utek itoy ken nangaramat pay iti nagan ni Enrile tapno makalusot.

Itay  laeng nabiit, saan a impangag ti Malacañang ti araraw dagiti kameng ti Run After The Smugglers (RATS) a kameng ti BoC gapu ta napaneknekan a nagbasolda iti extortion. Immapelada a makasublida pay koma iti trabahoda ngem saanen nga impangag ti Malacañang. Ta kasano koma nga isublim iti trabahoda dagiti naglabsing ken nagabuso iti takemda?

Kadagiti mangiwanwanwan iti BI ken BoC agtultuloy koma ti inkay panangpugipog kadagiti saan nga agnakem a lolong.#

Comments are closed.