Footer

BANNER NEWS: Video footage ti pannakapapatay ti sentensiador addan iti ikut ti polis

VIGAN CITY – Dua ti anggulo a kitkitaen ti kapolisan mainaig iti pannakapapatay ti maysa a sentensiador iti galiera  idi malem ti Oktubre 11 .

Kinuna ni Vigan City Chief of Police Supt. Jugith del Prado a kitkitaenda no adda pakainaigan ti pagsapulan ni Joseph Farpali y Soberano, 47, naasawaan, residente iti Barangay VI, iti pannakapapatayna.

Maysa a kristo wenno sentensiador dagiti maipallot a manok iti galiera ni Farpali.

“Amangan no adda napagurana iti panagsentensiadorna iti galiera,” kinuna ni del Prado.

Kasta met a kitkitaen pay dagiti inbestigador no adda koneksion ti kallabes a kaso ti biktima iti krimen. Naibalud ni Farpali gapu iti panangpaltogna iti manongna. Karuruar ni Farpali iti pagbaludan idi Marso daytoy a tawen.

Ngem kinuna ni Esperanza, asawa ti biktima, a nasayaat metten ti panaglangen ti asawana ken ti kabsatna ken awan ti ammona a manggurgura wenno nakariri ti asawana.

Innayonna nga insardeng metten ni lakayna ti agaramat iti shabu ket sangkaballakadna dagiti annakna a saanda a tultuladen.

Nupay kasta, nadakamat ni Esperanza nga adda dagiti tiempo a seknan ti “memory gap” ti asawana a mapapati nga epekto iti panagusarna iti droga iti napalabas.

Napapatay ni Farpali iti nagsulian ti Liberation Boulevard ken Crisologo Street, Barangay VI, ditoy siudad idi agarup 1:00 ti malem ti Oktubre 11.

Kas nairekord iti CCTV a naipasdek iti dayta a lugar, inabay dagiti suspek a naglugan iti XRM a motorsiklo ti Honda Wave R a nakisakayan ni Farpali a minaneho ni Faustino Fuller y Frando, 48, naasawaan, ken residente iti Barangay Cabaroan, Vigan City sa pinaputokan ti suspek a nagsakay iti likud iti namindua a daras ti biktima

Nagderetso ti lugan dagiti suspek idinto a naikras ti motorsiklo iti asideg ti sumungsungad a di nabigbig a babai a mapapati a maysa a turista.

Dead on the spot ni Farpali gapu iti sugatna iti ulona, segun iti doktor a nangtaming kenkuana kalpasan ti pammaltog.

Ngem kinuna ni del Prado nga iti footage ti CCTV,  nakatallikud dagiti suspek a nakaaruat iti helmet ken awan ti plaka ti luganda isu a dida pay nabigbig.

Kasta met a saan pay a nagparang ti babai a saksi iti krimen.

“Mabalin a nakigtot iti napasamak ta two to three meters laeng ti kaadayona iti nakatumbaan ti motorsiklo (a nagluganan ti biktima,” kinuna ni del Prado.

Nupay kasta, babaen met laeng ti nasao a footage, naitudo dagiti inbestigador ti eksakto nga oras a pannakapapatay ni Farpali.

Nakarekobre dagiti inbestigador iti dua a kapsula a mapapati a nagtaud iti cal. 45 iti nakapasamakan ti krimen.

Nupay nangiwayat dagiti polis iti hot pursuit operation ken pinakdaaranda dagiti kaparangetda a police stations para iti panangipasdekda iti dragnet kadagiti posible a rummuaran dagiti suspek ngem nakalusot dagitoy.#