Footer

Truck a nagkarga iti coco lumber, na-impound

TAGUDIN, Ilocos Sur – Naipan iti police station ditoy ti maysa a truck a nasukalan iti checkpoint a nagkarga iti coconut lumber a naparabawan kadagiti bunga ti nyog idi rabii ti Oktubre 6.

Nangipasdek dagiti polis ditoy iti checkpoint iti national highway iti sanguanan ti tiendaan publiko iti Barangay Del Pilar kalpasan a nakaawatda iti report manipud iti maysa a personnel ti ENRO Task Force “Kalikasan” nga adda truck a nagkarga iti coconut lumber nga agpaabagatan.

Pinasardeng dagiti polis ti nasao a truck a minaneho ti maysa a Quiruben  Sembrana Perado, 30, residente iti Bateng East, Mangaldan, Pangasinan, idi agarup alas 8:20 ti rabii ket kalpasan ti yaanamong ti drayber iti kiddawda a mangsukimat iti kargana, naduktalan dagiti polis ti 235 a nadumaduma ti kaatiddogna a coconut lumber a naparabawan kadagiti bunga ti nyog.

Nairehistro ti truck ken ni Josephine Sembrana Perado ti Mangaldan, Pangasinan idinto a mapapati a ginatang ti maysa a Macario Narvasa dagiti lumber ken nyog.

Temporario a naipan ti truck ken dagiti kargana iti police station para iti disposision.#

Comments are closed.