Footer

Umatiberret ti Angin iti Burnham Park

Sarita ni Danilo S. de Guzman

(Maudi a paset)

 

“Awan iti gasatko kadagiti binunga a pasig a welwel ken bangad. Imbag kadakayo ta nanakem dagiti annakyo…” indumog ni Timot. Kontudo ngilangil ken singlotsinglot pay with matching facial expressions.

Anak na lasi, nalangsi bulasi! Ni Timoteo Cordova, ammona met ti agakting iti pakunsumision effect? Ngem agduaduaak no serioso daytoy wenno pammarang laeng a linaon ti kadagmelan a panunotna. Nasutil ti nadagmel a panunotna ket no sumbro – saan ketdi a naranggas dagiti sutilna ta pasaray mangibungada iti pageellekan no diman butata iti maidatag a situasion – butata wenno tapal iti nalaglag-an a panangiparang.

“Dagiti tallo nga annakko, nasayaat ti panagbiagdan. Addaanda iti kabukbukodan a negosio, addaanda pay iti trabaho iti nangato a posision. Isuna laeng, ta armendo daydiay inaunaan,” inggarakgak ti katayagan a kasla maayatan unay.

Maayatan iti armendo nga anakna? Ala, makaammokay lattan iti biagyo ngem diyo koma liplipatan ti panilpo ti biagmi met no agsisinatayo, he-he! Agparanudkayo uray no maminting laeng. Galante ti panangipudosko kadagitoy – nalukay ti imada a kas kalukay ti panagpangato ti tuktokda? Paliiw latta…

“Agasem daytan, ‘tay chicksna pinadawatanna iti house and lot iti maysa a subdivision a kompleto ti amenitiesna! Salbag nga ubing, nalastogak ngem pirmi a nalaslastog man metten…!” inggarakgak ni katayagan. Segun kenkuana, addan pamilia ti anakna ngem nangibalay pay laeng iti sabali.

“Isu? Awan dumanan a, ‘tay inaunaak met nga armendo, nga agtartrabaho idiay BoC, niregaluanna met ti chicksna iti SUV nga agpateg iti 2.4 million pesos ken susustentuanna pay,” inyellek met ni mas pandek.

Ket immangesak lattan iti nauneg. Ta nakitak iti mugingko ti biag dagiti babassit ken biag dagiti nasalsaliwanwan. Dumtengto met a ti panawen a sumaliwanwan ti biag dagiti babassit no la ketdi agpursigida a mangpadur-as ti panagbiagda, saan kadi?

Nataldiapak ti tumtumpaw a papel. Isu laengen daytoy ti inikkak iti panawen a pilitko a gaw-aten, uray saan met a nasken, babaen ti panagpugiitko-panagrukob kabayatan ti innak latta panagdengngeg kadagiti saritaan dagiti pasaherok.

Ania ngata ti linaon daytoy a papel a nakupin nga ay-ayamen ti naladog a danum ti Burnham Lake? Ngem marigatanak latta a manggaw-at. Isu nga inyad-addak pay nga inrukob ken impugiit.

“Ayanna ‘tay inaunaan nga anakmo, Tim?” sinaludsod ni pandek.

Iti panagrukobko-panagpugiit, saankon nga inkaskaso a gaw-aten ti nakupin a papel no di ket adda iti saritaanda ti yan ti utekko. Dimngegak lattan, dumtengto latta ti panawen a magaw-at ti papel. Ti kanawanko ti nakakapet iti nagalis a tengnged ti sinanpato idinto nga isawsawsawko ti kanawanko iti naladog a danum kabayatan ti innak panapaliiw iti saritaanda.

“Adda idiay Metro Manila. Agbibiag met a, iti pasig a kadagmelan. Di met maisuro, ania ngarud, biagna daytan a, no isu ti kayatna,” imbungisngis ni Timot.

“Ket no kunam itay a baknang daydiay nga anakmo,” kinuna ti katayatagan.

Iti dayta a nangngegko, inyad-addak pay ti nagpugiit-nagrukob a dimngeg iti saritaanda.

“Wen. Nasayaat ti panagbiagnan a ta agnanaed iti maysa a napintas a balay iti maysa a subdivision a kompleto ti amenitiesna. Inted dayta ti sugar daddyna met. Addaan iti napintas a SUV nga agpateg iti 2.4 million pesos ken nagduduma a savings account nga inted ti sabali pay a lalakina met…”

SPLASHH!!!

“Whoa!” Inyikkisko ta naibbatak ti kapetko ket immuna ti ulok a nanabsuok iti kimmunig a danum iti Burham Lake. Lalona ket umatiberret ti angin ket kellaat lattan a nariknak ti lammin. Inagawaak ti kimmalab iti bilog ken simmalpa.

“Ne, apay, kukuaemon, Ben…?”

“Naikagliska, isu a natinnagka, Ben…?”

“Apay, partner?” inyellek ketdi ni Timot.

“Umatiberret ti angin iti Burham Park. Urayak la naiyangin ken natnag iti bilog…” impigergerko nga imbaga ti rasonko.

Nagkakatawada…

ISURSUROTKO ti panagkitak iti likudan dagiti dua a lallaki, agngilngilangil ken naggayad ti isemko, ta uray no adda puypuyotda, galanteda met ta inyawatandak iti sagduduada a bukel a sagsasangaribu. Dakkel a tip daytan. Buenas nga aldaw, uray no naslepak gapu iti pannakatnagko iti bilog.

Pak! Bog! Diak pay nakaanges iti kellaat a pannakatambiog ti bukotko.

“Bao ninam, apay a tumambiogka! Pasubsobanka kamman…!”

“Dimo ibaga a dika pinaranudan, partner. Inaldaw koma, aya, nga umatiberret ti angin iti Bunham Park…” inyellek ni Timot.

Ket naisurotak iti bungisngisna.#

Comments are closed.