Footer

2 natay iti aksidente ti lugan

CANDON CITY – Dua ti natay kalpasan nga insagad ida ti bus a nangdungpar iti luganda iti national highway ti Barangay Paras ditoy siudad idi parbangon ti Oktubre 14.

Naideklara nga awanen ti biag da Eduardo Giray y Infante, 47, naasawaan, karpintero, ken ni Pio Wagayen y Dag-usen, 50, naasawaan, mannalon, agpada a residente iti Barangay Palacapac, Candon City idi maidanonda iti ospital  gapu kadagiti grabe a sugatda gapuanan ti panangisagadsagad kadakuada ti Dominion Bus a minaneho ni Artemio Ulanday y Castillo, 37, baro, ken residente iti Papallasen, Umingan Pangasinan.

Segun iti panagimbestiga dagiti nagresponde a polis, agpaamianan a direksion ti Dominion Bus idinto a naggapu met ti Honda Wave motorcycle a minaneho ni Giray iti daya nga abaga ti kalsada nga agturong iti abagatan a laud a direksion idi mapasamak ti aksidente.

Kinuna ni Ulanday a binusinaanna ni Giray idi makitana ti motorsiklo daytoy a sumrek iti highway ket nagsardeng daytoy ngem mapapati a kellaat a pinataray ti biktima ti luganna nga agpaabagatan a laud ket nupay linisian ti bus, nadungparna latta ti motorsiklo.

Naipit ti motorsiklo iti sirok ti makannigid a paset ti bus ket naisagad iti sumagmamano a metros manipud iti nagdinnungparanda.

Awanen ti puot da Giray ken Wagayen idi itaray ida dagiti polis iti ospital a nangideklaraan ti doktor nga awanen ti biagda.

Mapapati a kagapgapu nagginom dagiti biktima iti Janjas Videoke sakbay ti aksidente.#

Comments are closed.