Footer

Agsasaruno a proyekto dagiti balikbayan iti Cabugao, pammatalged ti panagtalekda ken ni Mayor Edgardo S. Cobangbang, Jr.

Salaysay da Salvador A. Espejo ken Mario Purugganan

(Maikadua iti tallo a paset)

 

Indanon ni Mayor Cobangbang ti nasao a proyekto iti maysa nga organisasion sadiay Hawaii ngem idi nangeg ti pamilia ni Dr. Charlie Sonido ti kinapateg ti nasao a klinika, dinagdagusna nga impatalged nga isudan ti mangibaklay iti mabusbos iti pannakaipatakder daytoy.

Kinuna ni Mayor Cobangbang a dagus a nangiyisio ni Dr. Sonido iti tseke a nainagan kenkuana a maaramat iti pannakaipatakder ti lying-in clinic ngem saanna nga inawat.

“Lying-in clinic ti dawdawatek, doktor, ket no adda pannakabalinna, clinic koma nga itedmo,” kinuna ni Mayor Cobangbang.

Imparang ni Mayor Cobangbang ken ni Dr. Sonido ti program of work ken ti masurot a plano nga inaramid ti Department of Health sana inyunay-unay a maited ken ni Dr. Sonido ti waya a mangpili iti kontraktor a mangipatakder iti klinika.  Iti met biang ti sangguniang bayan ti Cabugao, inanamonganna ti maysa a resolusion a mangipaay iti donasion a lote a pakaipatakderan ti lying-in clinic.

Kas counterpart ti munisipio, ken babaen ti pannakikammayyet ti sangguniang bayan nga idadauluan ni Vice Mayor Danny Gazmen ken iti komite ti salun-at a pagtsermanan ni Dr. Carlito Pano, naigiddan iti pannakaipatakder ti lying-in clinic ti pannakatarimaan ken pannakapasayaat ti pasdek ti rural health unit.

Kinumplementaran met daytoy ti Cabugao Sons and Daughters babaen ti panangidonarda kadagiti ramit ken alikamen para iti RHU nga agbalor iti $10,000.

Ti gunglo a mismo ti nagbirok iti suplayer kadagiti nasao a ramit ken alikamen nga inlista ti munisipio a kasapulan iti RHU.

Nakasagana met ti capitation fund a P2 milion ti munisipio a maigatang para kadagiti dadduma pay a ramit a pagkurangan ti RHU ken lying-in clinic tapno napimpintas ti serbisio medikal a maited kadagiti umili ditoy Cabugao.

“No addanto pay dagiti sumangpet a proyekto iti munisipio, kayatko a maidanon ti serbisio medikal kadagiti barbarangay,” nakuna ni Mayor Cobangbang.

Kas nadakamat iti ngato, nainaguraranen ti agbalor iti P2.3 million a  pagganakan a napanaganan iti Rodolfo S. Sonido Lying-in Center kas pammadayaw iti daydi ama ni Dr. Charlie Sonido. Nupay saan a nakadar-ay ni Dr. Sonido ken ti pamiliana, imbaonna ti kasinsinna a ni Elpidio Sonido a mangibagi kadakuada iti inagurasion ken blessing.

Naigiddan met a binendisionan ni Fr. Felix Costales, kura paroko ti Cabugao, ti napasayaat a rural health unit a nagbalin a kas counterpart ti gobierno munisipal iti naipatakder ti baro a lying-in clinic.

Impalgak pay ni Mayor Cobangbang nga adda met baro a dental equipment nga impaay ti gobierno probinsial para iti rural health unit.

Kinuna ni Mayor  Cobangbang nga iti agtultuloy a panangiburay dagiti kailianna iti suporta ken tulongda iti administrasionna ti pammatalged nga apresiarenda dagiti gannuat ken programana para iti panagdur-as ken pannakaitag-ay ti panagbiag dagiti kalugaranda.

Kinuna ti mayor a pagyamananna ta saan nga impaidam dagiti kailianna ti tulongda uray iti baet a saanda a napnek iti napanan dagiti donasion ken kontribusionda iti napalabas.

“Maysa nga apresiarenda ket ti makitada a panangipateg ken panangisakit ti administrasiontayo kadagiti donasionda ket nakitada a talaga a timmakder dagiti proyekto a nakaipanan dagiti kuartada,” kinuna ni Mayor Cobangbang.

(Adda tuloyna)

Comments are closed.