Footer

Ay, agtatakaw dayta!

Ni Danny B. Antalan

(Tuloyna)

 

Nakaad-adun nga insidente ti panagtakawan ti nai-blotter iti pulisia.  Ngem mabilbilang ti ramay dagiti matiliw.  Di pay ket ammon no daytoy ket gapu iti kinakuped dagiti pulis wenno kinaalisto dagiti mannanakaw. Agpatingga lattan iti imbestigasion ti mapasamak.  Isu ngata a naturturedda ta awan met ti matiliw kadakauda.

Adda met dagiti matiliw a saggaysa.  Ngem anian, ta intono kuan, makaruarda manen iti pagbaludan.  Bassit met ti piansana. Nalakada laeng a paaddaen. Di pay mapudotan no ar-arigen iti tugawna, addan mangpiansa kenkuana. Ania pay, wayawayaan ti korte.

Wenno saan, ruk-atan dagiti polis ta awan kano met ti reklamo. Wenno saan,  awan ti ebidensia a mangipaneknek nga isu ti nagtakaw ta awan met ti agsaksi. Dagiti tattao, uray nakitada ti panagtakaw, ibagada lattan nga awan ti nakitada. Dida ngamin kayat ti mairamraman. Pakataktakanda laeng kano. Wenno pakaisagmakanda. Namak payen no agsaksida ket barrairong met diay akusado, baka magerret ti tengngedda.

Dagiti dadakkel a sindikato, adda pay bukodda nga abogado a mangiruar kadakuada no matiliwda iti operasionda. Wenno saan, nalawan ti gamatda ta mabalin nga adda payen polis a kumplotda wenno mangsalaknib kadakuada no kasdiay a malipitda. Adun dagiti kaso a polis ti adda iti likudan dagiti panagtakawan.

Maysa pay a pakawayawayaanna no awan ti kaso a naipila kontra kenkuana.  Diay natakawan, iti un-unana nalabit mangipila iti darum. Ngem apaman a napasublina ti natakaw kenkuana, saanna metten a patuloyen ti agdarum. Ania ngarud pay, mawaswas ti kaso. Ta uray ammomon nga agtatakaw dayta a tao, dimo mabalin a tiliwen, ta saan kano met a caught in the act.  Awan kasona, ta mabuteng kano ti biktima a mangipila ti kaso.  Ania pay, makaruar manen a dina oras koma.

Agpayson sa nga adda pagadalan ti panagsipdutan ditoy probinsia.  Adalenda no kasano ti rumbeng nga aramiden tapno maala ti pitaka iti bulsa dagiti biktima wenno kuarta iti shoulder bag.  No matiliwda, sumaruno a plano ket ti di panangipila ti biktima ti kaso.  Sumrekto ditan ti umatiperper a panaginsasangitda iti sanguanan dagiti biktima.  Agpakpakaasi.  Adda pay mangitugot iti maladaga ket pagsangitenda tapno laeng maasian ti nabiktima.  Atiwenda da Nora Aunor ken Vilma Santos iti acting dagiti anak ti salbag.

Ngem no madi latta, addanton makisarita iti nabiktima a doblienda laengen nga isubli ti naala kenkuana… triple, wenno nangatngato pay.

Kas pangarigan, naipila ti kaso, P10,000 sa laeng a piansa, makaruaren.  Mabalin manen a mangbiktima.

Addan dagiti CCTV a maikabil kadagiti pagtagilakuan.  Adu nga agtatakaw ti mairekord iti CCTV a naala ti rupada ken naammuan ti kinasiasinoda.   Ngem agpatingga la ditan.  Iti kinaad-adu ti masipsiputan ti CCTV, manmano met ti matiliw kadakuada.  Agbalbalin laeng a simumulagat a tuleng dagiti CCTV kadagiti mannanakaw.  Buybuyaenna bayat ti panagtakawda ngem awan met ti maaramidanna.  Ania ngarud, awan met mangbantay.

Ti nakakalkaldaang, dagiti ubbing wenno menor de edad ti kaadduan kadagitoy matiltiliw nga agtatakaw.  Agtakawen ti 14-17 anios.  Nalaklaka ngamin a makasipdutda.  Nalaglag-an dagiti sakada.  Naparpartak dagiti garawda.  Dagiti bossda, para mandar laengen.  Ti pagsayaatanna kadakuada, no matiliwda, makaruarda met laeng nga insigida. Saan pay ngamin mabalin nga ibalud dagiti menor de edad.  No matiliwda a nagtakaw, maipanda laeng iti DSWD para iti counseling.  Kalpasan dayta a tse-tse buretse, makaruarda manen.  Intono makaruarda, iti sumuno a rabii, isuda manen ti matiliw nga agtaktakaw.  Makaruardanto manen.  Kasta a kasta.  Ket ti bossda a saan nga agparparang, agkatkatawa lattan.  Ania ngarud, pagbalbalinenna a lampinan dagiti pulis ken dadduma pay nga ahensia ti gobierno.

Narigat a solbaren ti panagtakawan.  Ta laklakaenda ti agtakaw. No matiliwda, awan ti agreklamo.  No adda man, agpiansada iti sangkatipping, agtakawdanto manen.  Ket uray ammoda nga isuna ti nagtakaw ngem awan met ti kasona, magmagna iti kalsada a kasla awan inaramidna.

Ngem ti rigatna, piman dagiti pulis a kanayon a maaw-awagan a natutulog sa pansitan gapu ta awan ti maaramidanda.  Piman dagiti biktima ti panagtakawan ta napukaw ti mano a tawen a nagrigatanda.  Piman ti gobierno nga awan ti natangken a lintegna a mangtiliw kadakuada.

Ay, Disiembren!#

 

Comments are closed.