Footer

Maibiahe a naputputed a tarikayo, nakumpiska

CANDON CITY – Napagmulta ti maysa a lalaki idinto a nakumpiska dagiti naputed a tarikayo a karga ti luganna idi nasalamaan dagiti polis sadiay Barangay Bagar ditoy siudad idi bigat ti Oktubre 16.

Napagmulta iti P1,800.00 ni Reynaldo Alcantara y Quiano, 49, naasawaan, ken residente iti Barangay Allangigan 2nd, Candon City gapu iti panaglabsingna iti PD 705 idinto a naipaima iti Department of Environment and Natural Resources dagiti naputputed a tarikayo a nasalamaan dagiti polis a naikarga iti Isuzu Elf a minaneho ni Alcantara a maibiahe koma iti Barangay Ambocao, Santiago, Ilocos Sur iti dayta nadakamat nga aldaw.

Pinasardeng dagiti polis bayat ti panagpatroliada iti Barangay Bagar ti Isuzu Elf a minaneho ni Alcantara kalpasan a nakaawatda iti report manipud iti hepe ti Barangay Peace and Order Action Team (BPAT) iti Barangay Amguid iti kaadda ti karga ti lugan a naputputed a tarikayo.

Kinumpiska dagiti polis dagiti naputed a mahogany ken G-melina nga agdagup iti 643.32 board feet ken agbalor iti P32,166.00 idi maysa laeng a certificate of transport nga inyisio ni Amguid Barangay Captain Romeo P. Del Rosario ti impakitana ngem awan ti  permitna manipud iti DENR.#

Comments are closed.