Footer

Maika-5 a Begnas Festival, maangay

CANDON CITY – Rambakan dagiti tribu a Bago, Itneg, Kankanaey, Tingguian ken dadduma pay a katutubo manipud nadumaduma nga  il-ili ti Ilocos Sur  ti Maika-5 a Begnas Ylocos a maangay idiay Galimuyod, Ilocos Sur manipud Oktubre 21 agingga iti 25.

Kinuna ni Ruben Bastero, Regional Director ti National Commission on Indigenous Peoples (NCIP), bayat ti interbio kenkuana ti DZTP Radyo Tirad Pass, a paset daytoy ti pannakarambak ti  maika-15 nga anibersario ti Indigenous Peoples Rights Act.

Dagiti sumaganad dagiti naisagana nga aktibidad iti Begnas Ylocos Fest, segun ken ni Bokal Robert Tudayan:

*Oktubre 21-24 – maisayangkat ti maysa a panagsanay dagiti napili nga agtutubo iti kannawidan a sala ken kanta ti tribu sadiay North Luzon Philippines State College (NLPSC) a partisiparan ti 50 nga IP Youth.

*Oktubre 24-25:  maangay ti dua aldaw a Trade Fair iti sanguanan ti munisipio ti Galimuyod, Ilocos Sur.

*Oktubre 25 (kaaldawan ti Begnas Ylocos):  maisayangkat ti ritual ken pannakapili ti Baggak ken Bagnos ti Begnas 2012,   pasalip ti panaglutuan kadagiti exotic foods ken organic foods.

Manamnama  a makipartisipar iti parambak dagiti tribu manipud iti Alilem, Burgos, Nagbukel, Lidlidda, San Emilio, Banayoyo, Quirino, Narvacan, Candon, Santa Lucia, Tagudin, Santo Domingo, Galimuyod, Salcedo, Gregorio Del Pilar, Suyo, Sigay, Cabugao, San Juan, Santa Cruz, Cervantes, Sugpon ken Magsingal.

Kabayatanna, naangay iti La Union itay Oktubre 20 ti “Taray ti Ragsak” a nakipasetan dagiti empleado ti gobierno a pakairamanan dagiti IPs, kas paset ti pannakarambak ti National Indigenous People’s Month (NIPM) a maselselebraran iti bulan ti Oktubre kas panangbigbig kadagiti katutubo iti amin a paset iti pagilian.

Impalgak ni Bastero a kas panangselebrar iti NIPM, naipatangatang kadagiti amin a radio stations ti Radyo ng Bayan ken DZTP dagiti guidelines, programa, proyekto ken dadduma pay nga aktibidad ti NCIP.

Naangay pay idi Oktubre 20 ti IP Congress a nakipartisiparan dagiti iskolar ni Gov. Manuel Ortega ken Cong. Victor Ortega a nakatrataran dagiti isyo ken pakaseknan iti pannakasalaknib ti kultura dagiti katutubo.

Maangay pay inton Oktubre 27 ti misa ken pasalip iti panaglutuan iti taraon dagiti IPs nangruna ti Etag, napreserba a karne, sadiay Pugo, La Union kas culminating activity.

Manamnama ti idadar-ay ditoy dagiti nadumaduma a munisipalidad nga addaan kadagiti organisado a tribal councils wenno gunglo.

Kinuna ni Bastero a maipasagepsep bayat ti selebrasion ti Begnas Festival ti panangtaginayon kadagiti nakaisigudan a sala, kanta ken kannawidan.

Paset pay ti selebrasion ti pannakaipaay iti cataract screening kadagiti katribu ken uray pay dagiti saan a kameng ti tribu.

Sagudayen ti Proclamation No. 1906 series of 2009 ti pannakaideklara ti Oktubre kas National Indigenous People’s Month.

Ti tema ti parambak ita a tawen: “IPRA ay Gabay sa Kaunlaran. Isaisip, Ipabatid at Isakatuparan.” (Danny Antalan)

Comments are closed.