Footer

Agkalugaran, nagtinnagbat

CANDON CITY – Nagtinnagbat ti dua nga agkalugaran sadiay Barangay Darapidap ditoy siudad idi bigat ti Oktubre 24.

Natagbat ni Antonio Gagarin y Santos, 52, naasawaan, agar-aramid iti bangka babaen ti kalugaranna a ni Marcelino Pimentel y Valdez, 28, mangngalap, kalugaranna met laeng, a puon ti nakayospitalanna.

Segun iti polis, nagsubang da Pimentel ken ti ipagna a Marina maipanggep iti dagada ket idi limmabas ni Gagarin, inayaban ti suspek ket iti awan gapuna, kinabilna daytoy.

Mapapati a nangala ti suspek iti bolo iti balay ti ipagna ket tinagbatna ni Gagarin a nakasugatan ti maysa a ramay ti naud-udi.

Nangala met ni Gagarin iti bolo sana kinamat ni Pimentel ken tinagbat ti bukot ken makannigid nga ima daytoy.

Naitaray dagiti dua iti nagsina nga ospital para iti pannakaagas dagiti sugatda.#

Comments are closed.