Footer

Agsasaruno a proyekto dagiti balikbayan iti Cabugao, pammatalged ti panagtalekda ken ni Mayor Edgardo S. Cobangbang, Jr.

Salaysay da Salvador A. Espejo ken Mario Purugganan

(Maudi iti tallo a paset)

 

Sabali pay a proyekto ni Mayor Cobangbang ti kiniddawna iti sabali a gunglo dagiti kalugaranna iti California, ti pannakapaadda dagiti pasilidad para iti outdoor ken pool playground iti Central Park sadiay Barangay Bonifacio.

Natungpal daytoy  proyektona a pannakaipasdek ti napintas a paggaayaman dagiti ubbing idi Agosto 16 daytoy a tawen babaen ti donasion ti Cabugao Organization of Southern California (COSCA) iti panangidaulo ni Atty. Romeo Sajor. Karaman dagiti naipasdek ditoy a pasilidad ti slide, rocker, swing ken seesaw.

Ita, addan napintas a lugar a paggaayaman dagiti ubbing ditoy nga ili. Kadawyanen a buya iti malem ti kaburnok dagiti ubbing nga aggaayam iti playground, wenno dagiti nagannak nga agpallailang iti parke bayat ti panaggaayam dagiti annakda.

Natalged dagiti ubbing nga agay-ayam ditoy ta malaksid a nalagda dagiti pasilidad, adda pay naiyaplag a rubber mat iti semento tapno saan a masaktan dagiti ubbing no maisaltekda wenno agkabsiwda bayat ti panagay-ayamda.

Mainaig iti maikatlo a proyekto ni Mayor Cobangbang, naammuan a mismo a ti  dadaulo ti CANCA ti mangisangpet iti bayad ti innem nga streetlights nga idonarda iti Cabugao.

Sabali laeng dagiti personal a donasion dagiti indibidual a pamilia a para tunggal poste, kinuna ti mayor sana innayon nga indonar dagitoy dagiti kailianna “out of love” iti ilida.

Segun iti mayor, agtinnag a P60,000.00 ti mabusbos iti tunggal streetlight ta malaksid a naimuntar iti cement pedestal, nalukmeg dagiti postena, ken LED (Light Emitting Diodes) ti silawna tapno nain-inut ken basbassit ti makunsomo a koriente a bayadan ti munisipio.

“Dakkel a makatulong (dagiti silaw) iti pannakamentener ti linak ken talna iti Cabugao,” kinuna ni Mayor Cobangbang sana innayon a napintas daytoy a proyekto a mangipakita kadagiti indibidual a proyekto a mabalin nga esponsoran ti kada pamilia.

Masurot met laeng ditoy ti  baro a proseso a pannakaimplementar ti proyekto; iyawat ti gunglo ti kuarta iti kontraktor a pilienda a mangipatakder kadagiti streetlights.

Kinuna ti mayor nga apresiaren ti gunglo daytoy a proseso agsipud ta makitada a tumakder ti proyekto a pakabusbosan ti nagrigatanda a kuarta ken ammoda ti time frame a pannakalpasna.

“Makitami a napintas daytoy a mangipakita iti indibidual a proyekto a mabalin nga esponsoran ti tunggal pamilia,” kinuna ni Mayor Cobangbang idinto nga innayonna nga uray kasano nga ayat dagiti dadduma a kailianna a mamagtitipon kadagiti kontribusionda, saan nga umanay nga isemento kadagiti kalsada ngem babaen dagiti streetlights, indibidual a makitada ti pakaipanan ti donasionda a mangpapintas pay iti buya ti ilida a Cabugao.

“Saan a ti silaw ti eksakto a pagsasaritaan ditoy no di ti oportunidadda a makatulong iti ilida a Cabugao, ken ti oportunidad a mangipakita kadakuada a naayat nga agidondonar iti Cabugao nga adda gayam maysa a proseso nga ob-obserbarentayo a saan a pakasayangan, ken pakabastosan ti ayatda nga agidonar,” kinuna ni Mayor Cobangbang.

Panggep ti mayor a maipasdek dagiti streetlights manipud iti uneg ti ili agingga iti pagbeddengan ti San Juan ken iti pagbeddengan iti Sinait.

Kinuna ni Mayor Cobangbang a nakalaglag-an ti riknana a naggawid manipud iti global reunion agsipud ta nupay nalpasen dagiti immuna a tallo a prioridad a proyektona, nakaad-adu pay dagiti proyekto a kayat dagiti kailianda a maipaay iti Cabugao.

Kinuna ti mayor nga inyawisna kadagiti kalugaranna ti panaggawidda iti Cabugao sadanto pagsasaritaan iti pannakaiyimplementar dagitoy a proyekto a kayatda a maipaay para iti ilida.

Ti ili a Cabugao ti mangsangaili iti global reunion inton 2015. Dakkel la ketdi a pasken ken gundaway metten dagiti balikbayan a mangkita kadagiti timmakder a proyektoda a nakaipanan dagiti nagrigrigatanda a kuarta para iti ilida.#

Comments are closed.