Footer

Da Bigel ken Bileg iti Biag ni Ama Berto

Sarita ni Jobert M. Pacnis

(Maikadua a paset)

 

Idi laeng kanikapat a tawen a simmangbay ni Bigel kadakuada. Sagut daytoy ti maysa kadagiti komparina a bimmakasion manipud idiay Bulacan a nakaikamanganna. Segun iti komparina, maaw-awagan kan’ ti asona iti Beagle manipud iti pamilia dagiti hound. Am-ammo dagiti hound a nalaing a sumaep, agbirok iti makan ken nalakada a masursuruan.

Ditoy metten nga innala ni Ama Berto ti nagan a Bigel. Maysa pay, bagayna la unay ti maawagan iti Bigel ta no pagbaliktadem ti g ken l, agbalinen a Bileg. Mamati la unay ni Ama Berto nga adda bileg ni Bigel a di kabaelan ti ordinario nga ayup.

KAGAPGAPU ni Ama Berto iti talon kadayta a malem idi maar-arakattot ni Ina Pinang a simmabat kenkuana.

“Ne, apayen, aniat’ kueemon, Baket?”

“Ni Bigel, Lakay…” di a maituloytuloy daytoy ti sawenna koma.

“Apay ni Bigel?”

“Awanen, Lakay… naatalan… itay laeng!”

“Ania?” uray la napleng iti nangngegna.

“Kasano a napasamak? Dina met galad ti mapmapan dita kalsada, a!”

“Adda itay dita alad iti igid ti kalsada. Pagammuan, adda dua a traysikel a naginnoberteyk. Gapu ta adda masabatda, impaigid ‘diay maysa ti luganna ket uray la naipaspasari dita alad da Kumare Marilou. Nagaw-isna ni Bigel!” Karrubada ni Marilou.

Kasla marba ti barukong ni Ama Berto kadayta a nangngegna. Kasano pay ita ti bugbugtong nga anak ni Bigel? Numona ta di pay kabalinan daytoy ti mangan iti innapuy.

“’Yanna ngarud ita ni Bigel?”

“Addad’ta sirok ti kaimito…”

Maasian la unay ni Ama Berto iti nakitana a langa ni Bigel. Nadigos iti bukodna a dara. Naderder pay ti dua a patongna. Saanen nga umang-anges.

Napasennaay ni Ama Berto. Panagriknana, adda nalapgis iti kinataona. Imbilangnan a kameng ti pamiliada ni Bigel.

Inap-aprosanna ni Bigel. Kasla dina pay laeng patien a nalamiisen a bangkay daytoy.

“Ania ti planom?” sinaludsod ni Ina Pinang.

Ngem sakbay a nakasungbat ni Ama Berto, napasungadanna ni Mang Baldo a kapurokanda. Sikat kadagiti mangnginom ta azucena ti isursursorna a tagilako babaen ti motorna a tintinnaganna.

“Pare,” kinuna daytoy, “umayak man.”

“Dumanonka, Pare,” kinunana. “Nakapasiarka man…”

“Kua ngamin, Pare… nadamagko ti napasamak iti asoyo. No mabalin koma, umayko ud-odan ta siakon ti makaammo.”

“Diak nga ited, Pari,” kinunana. “Napateg kadakami…”

“Diak met ketdi a dawaten, Pari. Bayadak. Ngem,ne, menos presio, a, ta natay metten…”

“Uray pay, Pari,” adda tibker iti timekna.. “Itabonko laengen ngem ti mapulotan…”

“Sayang, a, Pari…”

“Kas nakunakon, Pari, napateg kadakami ni Bigel. Imbilangmin a kameng ti pamiliami.”

Awan naaramidan ni Mang Baldo. Leppay dagiti abagana a pimmanaw.

“Dimo pay la inted, Lakay,” kinuna ni Ina Pinang kenkuana. “Isu pay koma nga inayon iti ipaw-ittanto manen kadagiti ubbing.”

“Maawatannak koma, Baket. Nasakit ti riknak a mangpanunot a mapulotan laeng ni Bigel. Saan nga ayup ti pangikabkabilangak kenkuana.”

TAPNO agbiag, pinakan ni Ama Berto ti uken babaen ti mamador. An-anusanna daytoy a pakunnoten babaen ti nadawatna a mamador. Bigat, aldaw, malem nga itemplaanna iti gatas. Naimbagto la no mangan iti innapuy, kunkunana iti nakemna.

Gapu itoy, adda pasugnod ni Ina Pinang kenkuana. Bassit kano la ngaruden ti masapsapulanda, karaman pay laeng iti ibadyetanda iti gatas ti aso. Ngem tapno awan ti panagsubang a mapasamak, saan lattan nga ikaskaso ni Ama Berto ti asawana.

Sabagay, kunkuna ni Ama Berto iti nakemna, adda rason ni baketna. Ngem konsensiana met no baybay-anna lattan ti uken a matay. Anak pay met ngarud ti imbilangnan a kapatgan a gayyem…  pudpudno a gayyem a ni Bigel!

Pinanagananna ti uken iti Bileg tapno kanayon a malaglagipna ti ina daytoy. Akuen ni Ama Berto, imbilangnan a kas kameng ti pamiliada ti aso.

“Dayta manen nga uken ti nasangom!” saan a napuotan ni Ama Berto ti yaasideg ti asawana bayat ti panangap-aprosna ken ni Bileg. Kalkalpasna a pinadede daytoy. Tengnga ti aldaw.

“Dika kad’ agpungpungtot, Baket. Ania ti ammom no daytoy nga aso ti mangidateng iti suerte iti biagtayo…”

“Suerte?” immusiig ni Ina Pinang. “Paggastuan ketdi, a!”

“Malagipko ita, Baket, daydi tatang. Nasaona idi kaniak nga uray ayup, adda met imetda nga enerhia a mabalin a mangtulong iti tao.”

“Dika maaw-awatan,” immurareg ti baket sa met la timmallikud.

Napasanamtek laengen ni Ama Berto.

(Adda tuloyna)

Comments are closed.