Footer

Independiente a kandidato para konsehal iti Candon City, insanudna ti kandidatura

CANDON CITY – Nalpasen ti eleksion ditoy siudad nupay saan pay a nangrugi ti panagkakampania  agsipud ta awanen ti kasango dagiti kandidato ti Liberal Party  manipud iti mayor agingga iti konsehal gapu iti panagsanuden ti bugbugtong nga independiente a kandidato para konsehal.

Naammuan ken ni Atty. Fidel Gines, election officer ditoy, a nakaawatdan iti certificate of withdrawal manipud ken ni Dr. David Ignacio, independent candidate para konsehal, a saanen a tumaray iti eleksion inton Mayo 2013.

Nagipila ni Ignacio iti sertipiko ti panagsanudna a kandidato para konsehal idi malem ti Oktubre 18.

Kas resulta, awanen ti sipar ti panagkonsehal da Atty. Kristelle Singson, George Valdez, Rhoda Abrero, Nestor Itchon, Aris Valdez, Florendo Mangasar, Angel Balagot, Charina Bona, ken dagiti kabarbaro a sumrek a da Kapitan David Wagayen ken ni Aileen Acal.

Unopposed da Dr. Ericson Singson, kandidato para mayor, ken ni Vice Mayor Alfonso Singson, pailayon a para bise mayor.

Anak ni dati a Deputy House Speaker Eric Singson ken kandidato para congressman ti second district ni Dr. Singson.

Saanen nga agkandidato ni Mayor Allen Singson, sabali pay nga anak ni Singson, agsipud ta maungpotnan ti tallo a nagsasaganad a terminona.

Uray iti Vigan City, unopposed da incumbent Mayor Eva Marie S. Medina ken ni pailayon a Vice Mayor Lourdes Baquiran.

Nupay kasta, adda sumagmamano a saan a naitiket  ken ni Medina a sumango iti kinakonsehal. (Danny Antalan)