Footer

Kapolisan nagballaag iti publiko a di paallilaw iti Budol-Budol Gang

VIGAN CITY – Imballaag ti kapolisan ditoy ti panagannad ken saan a panagtaltalek ti publiko kadagiti umasideg kadakuada nga agilako kadagiti alahas iti nalaka a presio tapno dida mabiktima ti Budol-Budol Gang.

Imballaag daytoy ti kapolisan kalpasan a maysa manen a negosiante ti biniktima ti Budol-Budol Gang idi malem ti Oktubre 22 ditoy siudad ti Vigan.

Nagpulong iti polis ti biktima a ni Marilyn Ramos y Anunciacion, 40, naasawaan, ken residente iti Barangay Saoang, San Juan, Ilocos Sur a linoko ti dua a babbai a mapapati a kameng ti Budol-Budol Gang a nakapukawanna iti P30,000.00.

Segun ken ni Anunciacion,  adda iti Plaza Maestro iti agarup alas 3:45 ti malem ti Oktubre 22 idi inasitgan dagiti suspek ket nagpatulongda kenkuana no adda ammona a pagparegregan iti sikog.

Mapapati a nagpammarang ti maysa a sinikogan ti US Navy.

Saan nga intaltalek ni Anunciacion dagiti suspek ngem sinurot dagitoy ket kinumbinsirda ti biktima a manggatang kadagiti dua a kuentas nga addaan iti pendant ken maysa a singsing a diamante ti batona.

Intanggaya dagiti suspek dagiti alahas iti P30,000.00 nupay kunada nga agbalor dagitoy iti P96,000.00.

Tinawagan ti negosiante ti lakayna maipapan dagiti alahas nga ilaklako dagiti suspek.

Kinasarita dagiti suspek ti asawa ti negosiante ket naallukoyda daytoy a manggatang kadagiti alahas.

Kinuna ni Anunciacion a nag-withdraw iti kuarta iti bangko.

Kalpasan a naala dagiti suspek ti P30,000.00 ken naiyawatda dagiti alahas, nagdardarasen dagitoy a pimmanaw.

Nagturong ni Anunciacion iti maysa a pawnshop sana pinaamiris dagiti alahas ket ditoy a naduktalanna a peke dagitoy.

Dagus a napan nagpulong ti baket iti polis ngem saandan a nasapulan dagiti suspek.

Impakita pay dagiti polis iti biktima ti retrato dagiti natiltiliw a kameng ti Budol-Budol Gang ngem awan ti nabigbig ti biktima.

Nupay kasta, namnamaen ti polis a matakuatan ti kinaasino dagiti suspek agsipud ta naammuanda nga adda naikapet a CCTV iti bangko a napanan nangiruaran ti baket iti kuartana ket mabalin a naalaan iti footage dagitoy.#

Comments are closed.