Footer

Nagtagipaltog nga agtutubo, inaresto dagiti polis

STA. CATALINA, Ilocos Sur  Maisagsaganan ti kaso a panaglabsing iti PD 1866 as amended by RA 8294 maikontra ken ni Jomar Molina y Amicay, 21, naasawaan, ken residente iti Zone VI, Bantay, Ilocos Sur gapu iti pannakakumpiska iti ikutna ti maysa a homemade cal. 22 revolver sadiay Barangay Pangada idi agarup alas 11:00 ti rabii ti Oktubre 19.

Segun iti report, kinamat da Molina a naglugan iti nangisit nga XRM motorcycle a minaneho ni Dave Martinez y Azada, 20, naasawaan, ken residente iti Barangay Nagsangalan, Vigan City ti motorsiklo a minaneho ni Cesar Rabot, Jr. y Panela, 18, baro, ken residente iti Barangay Pangada, Sta. Catalina, kasakayna da Ronald dela Rosa, 19, baro, kalugaranna, ken ni Ferlyn Faye Pablico, 18, taga-Bantay, ket idi makamakamda dagitoy iti arko iti Barangay Pangada, sinerregan ni Martinez ti dalan da Rabot ket napasamak ti komosion a nagtungpal iti mapapati a panangpaturong ni Molina kada Rabot ken dela Rosa.

Nagresponde ni PO1 Ronnie Amano a naka-duty iti dayta a kanito iti asideg ti engkuentro ket kinumpiskana ti paltog ni Molina.

Mapapati a nakainum da Molina ken Martinez idi mapasamak ti insidente.#