Footer

Suspek iti pannakapapatay ti konsehal ti barangay, nakasuan

CAOAYAN – Love triangle ti mapapati a ramut ti nakapaltogan ti maysa a barangay kagawad  a puon ti nakatayanna sadiay Barangay Fuerte ditoy nga ili idi rabii ti Oktubre 24.

Iti interbio ti lokal a media ken ni Police Chief Inspector Edmar Quiton, hepe ti polis ditoy, ti mapapati a kaadda ti relasion ti asawa ti biktima iti suspek a pimmaltog kenkuana ti kitkitaenda a nakagapu iti pammaltog.

Pinaltogan ni Rogelio Callebo, Jr. y Prio, 41, naasawaan,  ni Nomil Quias y Melmida, 35, agpada a residente iti Barangay Fuerte, bayat ti mapapati a konprontasionda iti paraangan ni Eugene Quiocho y Ponce idi agarup alas 10:25 ti rabii ti Oktubre 24.

Segun iti inisial a panagimbestiga dagiti polis, aggiinom da Callebo, kaduana ti sumagmamano a babbai a pakairamanan ti asawa ti biktima a ni Grace Quias y Ragudo, 32, iti uneg ti inaladan ni Quiocho idi simrek ti biktima sana kinumpronta ni Callebo.

Mapapati a ginuyod ti biktima ti lamisaan a paggiinoman da Callebo a nagtungpal iti panangasut ti suspek iti nakasalikad a paltogna sana pinaputokan iti naminsan ti biktima.

Ngem iti interbio ni Jun Ramos ken ni Quiocho a naipatangatang iti DWRS, kinunana a madiplomasia ti pannakipatang ti biktima iti suspek base iti nangegna bayat ti panagiladna iti uneg ti balayna.

Kinuna ni Quiocho a nangegna ti biktima a nagkuna, “Pare, ammom la ngaruden ti mapaspasamak kadakami nga agassawa, apay nga addaka pay la ditoy?”

Kinuna ni Quiocho a nangegna pay ti biktima a nagkuna, “Ne, ania dayta as-asutem dita bakrangmo….” a sinaruno ti kanalbuong.

Kinuna ni Quiocho nga idi rimmuar iti balayna, nakitana ti biktima a napasagen ken nakapaturong pay la ti paltog ti suspek kenkuana.

Kinuna ni Quiocho a pinadasna nga inagaw ti paltog ti suspek ket nagludonludonda sa nagpaarayat ket  babaen ti tulong ni PO3 Alex Molina a nairana a napan nakiminatay iti asideg, nadis-arma ti suspek ken naaresto.

Ngem iti met la interbio ti DWRS ken ni Callebo, kinunana a dinepensaanna laeng ti bagina.

Kinunana a nakitana nga adda dakes a motibo ti biktima kenkuana isu a pinaltoganna.

Naitaray ni Quias iti Gabriela Silang General Hospital ngem naideklara nga awanen ti biagna gapu iti sinagrapna a sugat iti makinkannigid a paset ti barukongna.

Naipaima met ni Callebo a nagsagrap iti dunor iti mugingna kadagiti nagresponde a polis agraman ti cal. 45 pistol a nagmarka iti Norinco ken addaan iti dua a bala iti magasinna.

Segun ken ni Mila Quias, ina ti biktima, nagsina ti anakna ken ti asawana gapu iti mapapati a kaadda ti relasion ti manugangna a babai iti suspek.

Kinuna ti baket a desididoda a mangidarum iti suspek gapu iti panangpapatayna iti anakna.

Iti pannakaisurat daytoy, naipilan ti kaso a murder maikontra ken  ni Callebo iti opisina ti provincial prosecutor iti Vigan City.#

 

Comments are closed.