Footer

7 maipuslit a baboy, pinaisubli polis iti Tagudin quarantine checkpoint

CERVANTES, Ilocos Sur – Kalpasan nakurang dua a bulan a panagpalamiisda, pinadas manen ti maysa a negosiante nga ipuslit dagiti baboyna ditoy probinsia  babaen ti idadaliasatda ditoy nga ili idi agsapa ti Oktubre 30.

Iti spot report manipud ditoy, naammuan a pinaisubli dagiti polis iti quarantine sadiay Tagudin ti Isuzu Jitney a nagkarga iti pito a baboy gapu ta awan ti maipakita dagiti nangkuyog a dokumento para iti pannakaibiaheda.

Pinasardeng dagiti polis ti lugan a minaneho ni Hanybal Bagos Necesito, 42, naasawaan, ken residente iti San Vicente, Pangasinan iti impasdekda a checkpoint idi agarup alas 8:30 ti agsapa ti nadakamat a petsa ket naduktalanda a nagkarga daytoy kadagiti baboy a maysa kadakuada ti takong.

Awan ti naipakita ni Charlito Canta, mapapati nga akinkukua kadagiti baboy, a dokumento a maibiahe dagiti dingnguen isu nga inkeddeng ti empleado ti municipal agriculture office a kuyogen dagiti polis ti lugan a maisubli iti quarantine area iti Tagudin.

Mapapati a naggapu ti lugan iti Pangasinan ket maibiahe iti kabangibang a probinsia ti Ilocos Sur.

Daytoy ti damo nga adda maireport a nasukalan a maibiahe iti probinsia kalpasan ti pannakatiliw ti maysa a lugan a nagkarga kadagiti pito nga oversized a baboy sadiay Banaoang, Bantay, Ilocos Sur idi rabii ti Septiembre 10 a mapapati a maidiskarga iti ili ti San Vicente sada maiserrek a maparti iti slaughterhouse ti siudad ti Vigan.

Sabali laeng ti nasalamaan dagiti polis-San Esteban nga 11 a baboy nga iyal-alis ti grupo dagiti lallaki manipud iti maysa nga Isuzu Elf a maikarga iti sabali a lugan idi parbangon ti Agosto 17.

Iti immun-una nga interbiona iti media, kinuna ni Provincial Veterinarian Dr. Joey Warren Bragado nga in-inut dagiti baboy a maiserrek iti probinsia sada mapagtitipon a maibiahe ken maidissaag iti kaparanget nga ili ti Vigan City.

Impudno ti pahinante ti lugan a nasalamaan dagiti polis idi Agosto 17 a nagdaliasatda manipud iti Mankayan, Benguet a napan iti Cervantes sada simmalog iti Suyo ken limsot iti Tagudin a nagurayan iti sabali a lugan a nangikargaanda kadagiti oversized a baboy.

Sabali ti rota ita dagiti nagipuslit: mapapati a nagnada iti sirok ti rangtay, kimmamangda iti dalan a saan a lumasat iti quarantine checkpoint sada simmalput iti Bitalag, limmasatda iti Suyo sa iti Cervantes a nakatiliwanda.

Iti maysa nga interbio ken ni ni Arnulfo Quitoriano, slaughterhouse master iti Vigan City, kinunana nga adda dagiti takong a maiserserrek a maparti iti slaughterhouse iti siudad nga awan dagiti papelesda ket suspetsana a naggapu dagitoy iti sabsabali a probinsia iti baet ti kaadda ti pammilin ni Gov. Luis “Chavit” Singson a saan a maipalubos a maiserrek dagiti oversized a baboy iti quarantine checkpoint iti Barangay Bio, Tagudin.

Innayon ni Quitoriano nga iti kaadu dagiti maparparti a takong iti slaughterhouse ti Vigan a dumanon pay iti 70 no kapigsana, mamati nga aggapuda iti sabali a probinsia agsipud ta manmano met dagiti dadakkel a hog raisers iti Ilocos Sur.

Tapno adda pagamkan dagiti agipuspuslit ti baboy, pinaparti ni Singson dagiti natiliw a naibiahe a baboy ket pinaiwarasna iti Balay Taripato ken iti pagbaludan.#

Comments are closed.