Footer

Mannalon ti Banayoyo, Most Outstanding HVC Farmer

CAOAYAN, Ilocos Sur -Napili a kas Most Outstanding High Value Crop Farmer iti Rehion I ni Marcelo de Peralta manipud iti Banayoyo, Ilocos Sur bayat ti Gawad Saka Regional Awarding iti NSCC Plaza ditoy nga ili idi Oktubre 30.

Kangrunaan a nakapilian ni de Peralta ti panagusarna iti papait ti nuang ken baka a kas organiko a pestisidio a pangpaksiatna kadagiti insekto dagiti nadumaduma a mulana a nateng, mangga ken saba. Ti payen pamiliana ti mismo a mangiproseso iti apitda a saba tapno agbalin a banana chips.

Kangrunaan a bisita iti daytoy nga okasion dagiti opisial ti Department of Agriculture Regional Office-I nga indauluan ni Assistant Secretary Edilberto de Luna, Ilocos Sur Governor Luis “Chavit” Singson ken dagiti opisial ditoy nga ili nga indauluan ni Mayor Germelina Singson-Goulart.

Napili met ni Ricarte Corpuz ti siudad ti Laoag kas Most Outstanding Hybrid Rice Farmer; Dominador Orpilla ti San Gabriel, La Union (Most Outstanding Integrated Rice Based Farming Systems); Francisco Alex Dani Pasion ti Marcos, Ilocos Norte (Most Outstanding Large Animal Raiser); Ronnel Pascual ti Vintar, Ilocos Norte (Most Outstanding Small Animal Raiser); Pedro Bartolome ti Siudad ti Laoag (Most Outstanding Corn Farmer); Emerson Tabios ti San Nicolas, Ilocos Norte (Most Outstanding Young Farmer); Bacarra Zanjera Irrigators Multi-Purpose Cooperative (Most Outstanding Small Farmers/Fisherfolk Organization).

Napadayawan met ti Sekder Tan Ilalo Farmers Cooperative (STIFAR) manipud iti siudad ti San Carlos kas Most Outstanding Barangay Food Terminal; Angelita Wagayen ti siudad ti Candon kas Most Outstanding Rural Woman idinto a naited ti maysa a citation iti Suksukit Rural Improvement Club ti Suksukit, Sto. Domingo.

Naipaay met ken ni Norma Lagmay ti Ilocos Norte ti pammadayaw kas Most Outstanding Provincial Agriculturist; Cornelio Balbesino ti Dingras, Ilocos Norte kas Most Outstanding Municipal Agriculturist idinto a Most Outstanding Agricultural Extention Worker ni Emely Lucero ti Siudad ti Urdaneta.

Mismo a ni Assistant Sec. Edilberto De Luna ti nangiyawat iti tropeo kadagiti napadayawan a mangirepresentar iti Rehion I iti nailian nga agpang ti salip a pakapilian dagiti kalalaingan a mannalon iti pagilian. (Mancielito S. Tacadena)

Comments are closed.