Footer

Rinibu nakipagrambak iti Raniag Vigan Twilight Festival

VIGAN CITY – Rinibribu a tattao a pakaibilangan dagiti turista, sangsangili ken residente ti naglilinia iti igid ti kalsada a nagdalanan ti parada ti Raniag Vigan City Twilight Festival a naangay ditoy idi malem ti Oktubre 27.

Kinuna ni Mayor Eva Marie S. Medina a maragsakan iti resulta ti Vigan City Raniag Twilight Festival 2012 agsipud ta napimpintas dagiti naitampok nga aktibidad iti daytoy a tawen.

Daytoy ti maikatlo a tawen a pannakaangayna, nangrugi ti Raniag Vigan City Twilight Festival itay Oktubre 26 ket nagpatingga itay Nobiembre 3 a nakaangayan pay dagiti nadumaduma nga aktibidad a kas dagiti sumaganad: Oktubre 27 – streetdancing competition; Oktubre 28 – Float parade (6:00 p.m.), Arroz Caldohan sa Plaza Burgos (7:00 p.m.); Oktubre 29 – Halloween Fun run (5:00 p.m.), Trick or Treat (6:00 p.m.); Oktubre 30 – Accoustic Competition (Celedonia Garden, 5:00 p.m.), Candle floaters (Celedonia Garden, 6:00 p.m.); Oktubre 31 – Wish and sky Lantern (UNP Filed, 7:00 p.m.), Halloween Party (Cafe Leona); Nobiembre 1 – Halloween Party (Lyric Bar; Nobiembre 3 – Halloween Party (Legacy Bar).

Walo a grupo ti nakipartisipar iti streetdancing no sadino a nagaruatda kadagiti costumes ken nakaitedan ti P50,000.00 iti kampeon, P30,000.00 iti maikadua a gunggona, ken P20,000.00 iti maikatlo a gunggona. Naikkan amin dagiti nakisalip a di nangabak iti consolation prize a P10,000.00.

Sangapulo ket uppat a barangay ti nakisalip met iti float parade a nakaitedan ti P50,000.00 iti kampeon, P30,000.00 iti first runner-up ken P20,000.00 iti second runner-up, ken consolation prize a P10,000.00 kadagiti amin a di nangabak a nakisalip.

Idi Oktubre 2010, naangay ti Umuna a Raniag Twilight Festival kas paset ti panangselebrar iti All Saints’ Day ken All Souls’ Day a tinawen a maang-angay iti Nobiembre 1 ken 2.

Ad-adu dagiti naitampok nga aktibidad iti daytoy a tawen a pangawis kadagiti ad-adu pay a turista nga agpasiar iti Vigan City.#