Footer

Balay, napuruakan iti granada

CERVANTES, Ilocos Sur -Napuruakan iti granada ti paraangan ti maysa a residente ti Barangay Rosario ditoy a nakabettakan dagiti bintana ti balayna idi rabii ti Nobiembre 4.

Saan pay nga ammo ti ania ti motibo ken kinasiasino ti nangibato iti granada iti paraangan ni Novel Ramirez y Bilag, 28, naasawaan, ken residente iti nadakamat a barangay.

Iti panagimbestiga dagiti nagresponde a polis, sakbay ti insidente, nagginom da Ramirez ken ti gayyemna a ni Dominic Eugenio y Eugenio, 20, baro, residente met laeng iti nasao a barangay ngem addaan iti permanente nga adres iti Barangay Pagpandayan, Vigan City, iti balay ti ina ni Ramirez.

Idi agangay 9:00, nakita ni Novel ti maysa a tao a nakaaruat iti bonete ken atiddog ti manggasna a bado a suspetsoso ti tignayna iti sanguanan ti balayda.

Nagsubli manen ti suspek isu nga inawis ni Novel ti gayyemna a sumrekda iti uneg ti balay.

Kellaat a nakangegda iti napigsa a kanalbuong iti ruar ti balay a nangbuong kadagiti sarming ti tawa ken nangabut iti daga iti lima a pulgada ti kalawana ken aguneg iti tallo a pulgada.

Nakarekobre dagiti nagresponde a polis iti safety level ti hand grenade ken nadumaduma pedaso a landok iti nagbettakan ti granada.

Agtultuloy ti panagimbestiga dagiti polis mainaig iti nasao nga insidente.

Kabayatanna, m aysa a granada ti nasarakan dagiti trabahador bayat ti panagkalida iti likudan ti municipal hall ditoy nga ili idi malem ti Nobiembre 5.

Iti report manipud iti polis ditoy, nakaiyaon dagiti trabahador iti daan a granada bayat ti panagkalida iti likudan ti municipal hall idi agarup 3:50 ti malem ti nadakamat a petsa.

Madama ti road improvement iti likudan ti municipal hall idi makali dagiti trabahador ti nasao a vintage hand grenade.

Impaima ni Barangay Kagawad Daniel Lanoy ti granada kadagiti nagresponde a polis para iti maikanatad a disposision.

Saan a naaireport no live ti granada.#

Comments are closed.