Footer

Dagiti biktima ti pannakalmes, sirena ti akingapuanan?

Ni Jose Ed. Sajonia

   Kas insalaysay ni Mrs. Jesusa Imperio-Villaruz, Brgy. Quimmallogong, Sinait, Ilocos Sur.

(Tuloyna)

 

Ti baro a suspetsa a binales ti sirena sadiay Barangay Pug-os, Cabugao

 

Innem a pulo ket dua a tawenen ni Uliteg Andring. Iti asideg ti baybay ti nagbalayanna. Adu dagiti estoriana a nalnalmes iti baybay a narigat a maipalawag  agsipud ta datdatlag dagiti pasamak. Nadakamatna ti dua a lallaki a taga-Abra a nalmes iti kabaybayan a mabatogan ti lugarda.

Naestoriana ti nabiit pay a napasamak iti maysa nga agtawen iti duapulo a baro nga adu ti agsuspetsa nga innala ti sirena.

Segun ken ni Uliteg Andring, masansan nga umian dagiti agbabarkada a pasig a babbaro a pakairamanan ni Marcos (saanna a pudno a nagan) iti maysa a kalapaw iti igid ti baybay. Magustuanda ti umian iti kalapaw agsipud ta malaksid a nadalus ti puyupoy nga aggapu iti baybay, nalamiis pay aglalo iti pumarbangon.

Segun ken ni Uliteg Andring, maysa a sardam, nakariing ni Marcos idi adda timek a kasla mangay-ayab kenkuana. Simmirip iti regkang ti diding ti kalapaw. Nakitana ti babai a nakapuraw iti igid ti baybay. Kasla naggapu  iti baybay ti babai.

Immapon ti buteng ken ni Marcos ta simmiplot iti panunotna dagiti nangnangegnan nga estoria maipapan iti white lady.  Adu dagiti estoria dagiti mangngalap iti lugarda a  masansan a masalsalawda ti white lady iti rabii nga ipapanda panagkalap wenno iti sumipnget nga agar-arbis iti kakaykaywan iti igid ti baybay.

Kinita ni Marcos dagiti kakaduana, naimas ti turogda. Dina impadlaw ti butengna ket pinaliiwna ti umar-arubayan iti kalapaw.

Aw-awisen ti babai a rummuar iti kalapaw. Mapanda kano aglang-ay iti baybay. Ngem pinagtalinaed ni Marcos a natalinaay ti panagpampanunotna. Mamati a no patganna ti awis ti babai, adda dakes a mapagtengna.

Idi saan a maawis ti babai ni Marcos, madamdama, nagpukawen.

Inestoria ni Marcos iti barkadana ti napasamak iti napalabas a rabii. Kinatawaan ketdi dagiti gagayyemna. Sinutilda pay ketdi a nagsayaat koman no simmurot ta bareng pabalonan ti babai kadagiti perlas ken dadduma pay a gameng iti tukot ti baybay.

Naulit manen ti panagparang ti babai iti maysa a rabii a yuumian manen da Marcos iti kalapaw. Ngem saanna nga intulok nga abaken ti babai ti panunotna.

Maysa a rabii a yuumianda manen iti kalapaw, intugot ni Marcos ti paltogna. Kas ninamnamana, nagparang manen ti babai. Inawis manen daytoy a mapanda agpallailang iti baybay.

Kellaat a nagputok ni Marcos. Uray la nagkulagtit dagiti kakaduana iti pannakakellaatda iti kanalbuong. Ngem idi kitaenna ti nagtakderan ti babai, awanen daytoy.

Kabigatanna, nakikuyog ti baro a napan nagpasiar iti Puro Badoc. Nagluganda iti bangka a demotor. Gapu iti nakaro a pudot iti panagdaliasatda, dinagdagus ni Marcos ti dimsaag sakbay a makadanon ti bangka iti igid. Pagattumeng laeng ti kangato ti danum iti dimsaaganna.

Ngem segun kadagiti nakaimatang, kellaat lattan a nagalikuno ti danum ket sinultopna ti baro. Idi saan a timpuar daytoy, sinawar dagiti pumurok. Nasarakanda laengen a tumtumpaw ti bangkayna iti kabaybayan.

Adu ti mamati a gapuanan ti White Lady ti pannakalmes ni Marcos. Binalesna ti baro ta napaay ti gagemna.

Ti nakaam-amak, segun ken ni Uliteg Andring, tumakdang ti white lady (sirena) no magustuanna ti tiempo ket mapan agsaed iti biktimaenna iti nasamek a paset ti national highway nga asideg ti baybay. Dayta kano ti pakaigapuan ti masansan a mapasamak a nadagem a desgrasia ti motor wenno lugan! Agsemplang a motor wenno agbaribar wenno tumpuak a lugan!

Nupay kasta, adu met nga umili ti saan a mamati iti white lady wenno sirena. Kadakuada, nadesgrasia dagiti motorista agsipud ta napardas ti panagpatarayda wenno nasobraanda ti imminom.

Taga-Barangay Tinaan, Sta. Maria, Ilocos Sur ni Jenriel Villaruz. Nagturpos ti BSAEd iti Ilocos Sur Agricultural College (ISAC). Kuna ni Nereo Somera Daproza, agdama a teknisian ti DA-LGU Cabugao, ken tubo iti Barangay Lingsat, Sta. Maria ken nayasawa iti Brgy. Rizal, Cabugao, Ilocos Sur  a masirib ken nalaing a lider ni Jenriel idi agbasbasada. Nagpresidente ni Jenriel  iti Supreme Student Council ti pagadalanda iti ISAC.

Nagayyem daytoy autor ni Jenriel gapu iti nagkaadu a seminar a nagtugmokanda. Kabarkada met ni Jenriel ni  Romulo Basuel, mannurat ti Bannawag ken nangato ti posisionna iti DepEd Sinait sakbay a nagretiro. Nagpaayda a translator iti libro iti elementaria ti DepEd.

“No nagnayon laeng a maestro daydi Jenriel  didiay  nangisuruanna, baka nagbalin koma  met a principal,” nakuna pay ni Uliteg Andring. “Nasingpet, naisem, napasig ken mannakigayyem daydiay nga ubing.”

Agingga ita, adu pay la a kalugaran ni Uliteg Andring ti mamati a sirena ti akingapuanan ti pannakalmes da Jenriel.#

Comments are closed.