Footer

EDITORIAL: Dimi kanunongan a mapagbalin a legal ti prostitusion

Saanmi a kanunongan ti sangaduyog a singasing ti United Nations a nasaysayaat a pagbalinen a legal ti prostitusion iti pagilian.  Kaiyarigannan daytoy iti libre a panagay-ayam iti apuy. Rumbeng kadi nga ay-ayamen ti apuy? Komplikado la unay. Napeggad nga ay-ayamen ti apuy ta dakkel ti posibilidadna a maladaman ti tao. Daytoy ti panagkitami itoy a proponer.

Nakarkaron a makapamisuot ti nagbatayan ti singasing. Tapno kano maliklikan dagiti sakit a maala iti pannakinaig iti masikkarud wenno mabayadan. Ti laeng nainlubongan a durog ti lasag ti mangiduron iti tao a makinaig iti mabayadan. Ti addaan asawa a makinaig iti mabayadan ket nalawag nga ipamatmatna nga addaan iti nababa a moralidad; dagiti laeng awanan kontrol iti bagida ti makaaramid iti dayta a banag. Makadadael pay iti relasion dagiti agassawa, ti binangonda a pamilia, ti reputasionda iti mata dagiti annakda.

Makatulong kano a mangprebentar iti nakaam-amak ken agraraira a human immunodeficiency virus/acquired immunodeficiency syndrome (HIV-AIDS) virus no maikkat dagiti pannusa a maipataw kadagiti sex workers, kuna ti UN iti naipablaak a report a napauluan iti “Sex Work and the Law in the Pacific.”

Saanmi a kanunongan dayta a singasing. Lagidawenmi. Nangibunga pay ketdi iti panagatap nga adda dakkel nga anniniwan a nalimed a namaggunay iti suhestion a kas kadagiti immunan a report ken padamag. Dagiti la ketdi manen higante nga anniniwan nga agsepsepsep iti nagling-etan ken urnong dagiti umili ken addaan iti nalimed nga interes ti mangitagtag-ay iti promosion kadagiti produktoda.

Kas napeklan a Kristiano (Katoliko), nangato pay laeng ti taktakderanmi a moralidad. Moralidad nga adda pay laeng iti dakulap ti mayoria iti populasion ken addaan pay laeng iti dakkel a panagtalek ken pammati iti maymaysa a Dios a kas talek ken tarabay kabayatan ti panagbiag.

Ibaba unay daytoy a singasing ti taktakderan a moralidad ti gimong. Guyugoyenna ti asinoman a tumapog ken agnunog iti naalinuno-nakubbuar ken naapres a karayan. Dayta ti kaiyariganna, awanen sabali pay.

Iti laksid ti panagraira dagiti masiksikkarud nga Eba, saan a ti legalidad ti prostitusion ti solusion iti parikut. Ta kaiyarigannan daytoy a no makasidsidaka iti letson a baboy ket puoramon a sibubukel ti ubong dagiti taraken. Minamaag nga aramid daytan. Saan nga umno a solusion iti parikut. Mailaksid iti naimbag a sursuro.

Uray dagiti saan a Kristiano a pagilian ket kondenarenda dagiti aramid a mangibaba iti dignidad.

No dagiti saan a Kristiano a pagilian ket nairut a kondenarenda dagiti aramid a mangibaba iti dignidad ken kinatao, anianto la ketdin iti pagilian a kakaisuna a Kristiano iti Asia?#

 

Comments are closed.