Footer

Nangkurimes 25 sako nga irik, natnag iti ima dagiti polis

STA. LUCIA, Ilocos Sur – Nanabtuog iti ima dagiti polis ti maysa a lalaki a nagtakaw iti 25 a sako nga irik kalpasan nga intudo ti tricycle driver a tinangdananna a mangilako kadagitoy.

Pinilaan dagiti polis ni Larry Hailar y Quitevis ti Barangay Pilar, Sta. Cruz iti robbery ket nai-docket daytoy kas NPS No. I-03-INQ-12K-00123 kalpasan ti inquest proceedings maikontra kenkuana iti provincial prosecutor’s office iti Vigan City.

Nagpulong iti polis ni Benigno Cachola y Gomez, 60, naasawaan, mannalon, ken residente iti Barangay San Juan, a natakaw ti 25 a sako ti irik nga impenpenda iti barangay hall  tapno ilakoda koma iti Nobiembre 6.

Iti panagimbestiga dagiti polis, naduktalanda a nakastrek iti barangay hall dagiti mannanakaw babaen ti panangputedda iti interlinks nga alad iti akindaya a paset ti plasa. Ditoy met ti mapapati a rimmuaran dagiti suspek.

Nagsaludsod dagiti polis kadagiti palay buying stations no adda nagilako kadagiti irik ket maysa nga aggatgatang ti nakadakamat a maysa a Freddie Jandoc, taga-Barangay Turod, Sta. Cruz, ti nagpanggep a mangilako kenkuana kadagiti sinako nga irik a karga ti traysikelna ngem dina kinayat.

Nagturong dagiti polis iti balay ni Jandoc ket intudo daytoy ti maysa a  Larry Hailar ken Christopher Mangurnong, taga-Barangay Angkileng, Sta. Lucia a nanangdan kenkuana a mangilako kadagiti irik.

Mapapati a nakalako ni Jandoc iti walo a sako ti irik iti buying station a kukua ni Sabel Hafalla a masarakan iti sanguanan ti tiendaan publiko ti Sta. Cruz.

Inaresto dagiti polis ni Hailar sa naipan iti police station.#

Comments are closed.