Footer

3 natay iti aksidente ti lugan

NARVACAN, Ilocos Sur – Tallon ti natay iti aksidente ti lugan a napasamak sadiay Barangay San Antonio ditoy nga ili idi rabii ti Nobiembre 14 kalpasan a pimmusay ti dua pay iti ospital a nakaitarayanda.

Immuna a pimmusay ni  Leonardo Vidal y Abalos, 31, baro, awanan lisensia nga agmaneho, ken residente iti Barangay Poblacion West, San Esteban, Ilocos Sur bayat ti pannakataming dagiti sugatna iti Central Ilocos Sur District.

Simmaruno a nagsatan iti biag ni Arvin Jay Espiritu y De Guzman, 18, baro, awanan driver’s license ken residente iti Barangay Quinarayan, iti met laeng Narvacan iti Metro Vigan Cooperative Hospital a nakaiyalisanna idinto a pimmusay met ni Macky Macapagal y Carolina, 31, naasawaan, ken residente iti Barangay Maynganay, Sta. Maria, Ilocos Sur, iti Gabriela Silang General Hospital.

Madama a maag-agasan iti Central Ilocos Sur District Hospital ni Jhonnie Juntillo y Rapisura, 26, baro, residente iti Barangay Quinarayan,  backrider iti Yamaha RS a minaneho ni Espiritu; idinto nga iti Metro Vigan Cooperative Hospital ti pakatamtamingan dagiti dunor ni  Ryan Marquez y Doro, 28, baro, ken residente iti Barangay Maynganay, Sta. Maria, Ilocos Sur. Agpada da Marquez ken ni Macapagal a backriders iti Honda Wave motorcycle a minaneho ni Vidal.

Iti kaudian a report, rimmuaren ni Wendell Ballesteros y Javier, 17, baro, ken residente iti Barangay Cadacad, sabali a backrider ni Espiritu.

Maipalagip nga idi agarup alas 11:05 ti rabii ti Nobiembre 14, agpaamianan a direksion ti Yamaha RS idinto a mapapati a simrek iti national highway ti Honda Wave  a naggapu iti laud a puon ti nagdinnungparan dagiti dua a lugan.

Gapu iti pigsa ti pannungpar, agpada dagiti lugan a naikras a puon ti nagsagrapan dagiti naglugan kadagiti dunor iti nadumaduma a paset ti bagida.

Naitaray amin dagiti nainbolbar iti aksidente iti Central Ilocos District Hospital ngem naiyalis da Espiritu ken ni Marquez iti Metro Vigan Cooperative Hospital iti Bantay, Ilocos Sur, ken ni Macapagal iti Gabriela Silang General Hospital.

Segun iti report, mapapati a nakainom amin dagiti nainbolbar iti nasao nga aksidente.#

Comments are closed.